Almaty mańyndaǵy 848 gektar jer memleket menshigine qaitaryldy. Buǵan qatysty naqty sheshimdi keshe Almaty qalalyq sotynyń azamattyq ister jónindegi alqasy shyǵardy. Bul týraly Májilis depýtaty ári jer qatynastary jónindegi maman Baqytjan Bazarbek óziniń áleýmettik jelidegi paraqshasynda málimdedi, dep habarlaidy Dalanews.kz.
Depýtattyń sózinshe, bul jerler general-maior, Almatynyń eks-ákiminiń kómekshisi Pavel Novikovtyń ieliginde bolǵan.
“Ataqty general Novikovtyń Almatydaǵy taý bókterindegi jerleri memleket menshigine qaitaryldy. Keshe Almaty qalalyq sotynyń azamattyq ister jónindegi alqasy birinshi instantsiia sotynyń sheshimin ózgerissiz qaldyryp, Almaty qalasy prokýratýrasynyń talap-aryzyn tolyq kólemde qanaǵattandyrdy.
2023 jyly Parlament Májilisiniń minberinen men Almaty qalasy, Bostandyq aýdanynda, taýdyń bókterinde, Ile Alataý ulttyq saiabaǵynyń qorǵaý aimaǵynda zańsyz túrde 2004 jyly jekemenshikke ótip ketken 848 gektar jerdi memleket menshigine qaitarý týraly talap qoiyp, Bas prokýratýra men Almaty qalasynyń prokýratýrasyna depýtattyq saýal joldaǵan edim. Osyǵan sáikes Bas prokýratýra saýaldy Almaty qalasynyń prokýratýrasyna joldady. Nátijesinde 2023–2024 jyldar aralyǵynda tiisti jumystar júrgizilip, Jer resýrstaryn basqarý departamentimen birlesip, prokýrorlyq tekserý uiymdastyryldy”, — deidi ol.
Aitýynsha, Novikov jer telimderin 2004 jyly “Halyqaralyq klýbtar qaýymdastyǵy” JShS arqyly ielengen.
“Tekserý barysynda birqatar zańbuzýshylyq anyqtaldy. Jer kodeksi men Sý kodeksiniń baptary qatań túrde buzylǵan. Naqtyraq aitqanda, 2004 jyldyń 17 maýsymynda Qarasai aýdany ákimdiginiń №6957 qaýlysy negizinde jáne 2004 jyldyń 1 shildesindegi №37009 satyp alý-satý sharty boiynsha atalǵan taý bókterindegi 848 gektar jer “Halyqaralyq klýbtar qaýymdastyǵy” JShS-niń jeke menshigine ótken. Bul jerdiń nysanaly maqsaty – aýyl sharýashylyǵy maqsatyndaǵy taýarly óndiris bolǵan”, — deidi ol.
Bazarbektiń sózinshe, ýaqyt óte bul jerler birneshe bólikke bólinip, ortaq kadastrlyq nómirmen tirkelgen.
“2014 jyly bul jer Almaty qalasynyń shekarasyna ótti. Keiin bul 822 gektar jerge 20313061080 degen ortaq kadastrlyq nómir berilip, odan ári 16 bólikke bólingen. Iaǵni, 20313060156 kadastrlyq nómirden bastap 171-shi nómirge deiin 16 jeke ýchaskege ainalǵan.
Prokýratýranyń basty talap-aryzy — bul jerler sý qorynyń aýmaǵyna jatady jáne Jer kodeksi men Sý kodeksiniń talaptaryna sáikes mundai jerler jeke menshikke berilmeýi tiis. Sebebi olar tek memleket menshiginde bolýy kerek. Al bul ýchaskede Kereńqulaq jáne Berqara sekildi ózender aǵyp jatyr. Bul ózenderdiń jeke menshikke ótip ketýi — zańnama normalarynyń óreskel buzylýy”, — dep qosty ol.
Sot sheshimi kúshine engen soń, Ile Alataýy bókterindegi kólemdi aýmaq qaitadan memlekettik menshikke ótti.
“Almaty qalasy prokýratýrasy osy negizde talap-aryz berip, birinshi instantsiia soty bul talapty tolyǵymen qanaǵattandyrdy. Kúni keshe qalalyq sottyń azamattyq ister jónindegi alqasy da bul sheshimdi kúshinde qaldyrdy. Iaǵni, Novikovtyń ieligindegi 848 gektar jer memleket menshigine qaitaryldy.
Men bul jerdiń zańsyz ekenin general Novikovtiń ózine kezinde eskertken edim. Ony tekseretinimizdi de aittym. Osyǵan bailanysty túrli qoqan-loqyǵa ushyradym. Alaida búginde áleýmettik ádilet saltanat qurdy”, — dep túiindedi ol.
Eske salaiyq, búgin Almaty irgesinde Ahmetjan Esimovtiń eks-kómekshisine tiesili jerler memleketke qaitarylǵany týraly jazǵan edik.
General-maior, otstavkadaǵy áskeri jáne Almaty ákimi Ahmetjan Esimovtiń burynǵy kómekshisi Pavel Novikov Almatynyń taýǵa jaqyn aimaǵynan iri jer telimderine ielik etken.
Bul ýchaskelerdi ol ózine qarasty «Halyqaralyq klýbtar qaýymdastyǵy» JShS arqyly ielengen. Endi sot sheshimimen bul jerler memlekettik menshikke qaitaryldy.
Áńgime 2004 jyly 25 million teńgege jekemenshikke rásimdelgen 840 gektar jer týraly bolyp otyr. Alaida prokýratýra atalǵan ýchaskeler sý qoryna jatatynyn jáne olardyń jekeshelendirilýi zańsyz júrgizilgenin anyqtady.
Búginde bul jerlerdiń naryqtyq quny – 54 milliard teńge.
Atalǵan aýmaqtyń bir bóligi (shamamen 100 gektar) alma men almurt ósirýge paidalanylǵan, al qalǵan bóligi bos jatqan.
Kompaniia bul isti birneshe márte daýlaýǵa jáne tipti Qazaqstan prezidenti Qasym-Jomart Toqaevqa júginýge tyrysqanymen, sot prokýratýranyń talabyn qoldady.
