Qazaqstanda bank qyzmeti men onlain nesie rásimdeýge qatysty jańa zań kúshine endi, dep habarlaidy Dala News.
Májilis depýtattary Murat Ábenov pen Baqytjan Bazarbek bastamashy bolǵan ózgerister azamattardyń quqyqtaryn qorǵaýdy kúsheitýge jáne qarjylyq alaiaqtyqtyń aldyn alýǵa baǵyttalǵan.
Jańa normalarǵa sáikes, endi azamattar bankterden ózine qatysty barlyq aqparatty talap etýge tolyq quqyly. Buǵan deiin qarjy uiymdary kóptegen málimetti «bank qupiiasy» dep bermei kelgen.
Murat Ábenovtiń aitýynsha, bul másele azamattardyń óz quqyǵyn qorǵaýyna kedergi bolǵan. Onyń sózinshe, endi kez kelgen adam bankke resmi suraý joldap, ózine qatysty barlyq aqparatty talap ete alady, al bank ony 10 kún ishinde usynýǵa mindetti.
Depýtattyń pikirinshe, bul ózgeris sottaǵy daýlardy ádil qaraýǵa múmkindik beredi. Sebebi buryn azamattardyń qolynda naqty dálelder bolmai, kóptegen ister sheshimsiz qalǵan.
Ábenov sondai-aq bankterge jai shaǵym jazýdyń nátije bermeitinin atap ótti. Onyń aitýynsha, azamattar aldymen bankten naqty aqparat talap etip, keiin ýákiletti organdarǵa júginýi kerek. Bankter óz kinásin moiyndamaitynyn eskerip, ol azamattardy qarjy naryǵyn retteitin organdarǵa nemese quqyq qorǵaý qurylymdaryna júginýge shaqyrdy.
Jańa zań aiasynda onlain nesie berý tártibi de aitarlyqtai ózgerdi. Buryn nesie qashyqtan rásimdelip, qarajat avtomatty túrde shotqa túse beretin.
Baqytjan Bazarbektiń aitýynsha, endi mundai tájiribe toqtatylady. Onyń sózinshe, azamat nesie alý úshin mindetti túrde bankke ózi baryp, ótinishin rastaýy tiis.
Depýtat bul talaptyń negizgi maqsaty alaiaqtardyń jolyn kesý ekenin aitty. Sebebi sońǵy jyldary biometriiany qoldan jasandy tásildermen ainalyp ótip, bóten adamnyń atyna nesie rásimdeý jaǵdailary kóbeigen.
Bazarbektiń túsindirýinshe, buryn ár banktiń óz biometriialyq júiesi bolǵan jáne ony aldap ótý múmkindigi joǵary edi. Endi bul júieler joiylyp, biryńǵai ulttyq biometriialyq baza engiziledi.
Onyń aitýynsha, barlyq tekserý Ulttyq banktiń júiesi arqyly ótedi. Bul biometriialyq málimetterdiń qaýipsizdigin arttyryp, jalǵan sáikestendirý táýekelin azaitady.
Sonymen qatar, jańa talaptarǵa sáikes, nesie maquldanǵan kúnniń ózinde qarajat birden berilmeidi. Azamat bankke baryp, óz kelisimin naqty rastaýy tiis. Bul qysymmen nemese aldaý arqyly rásimdeletin nesielerdiń aldyn alýǵa baǵyttalǵan.
Depýtattar aldaǵy ýaqytta taǵy bir mańyzdy ózgeris engiziletinin aitty. Atap aitqanda, sot sheshiminsiz shottardy buǵattaý tájiribesin toqtatý josparlanyp otyr. Qazirgi kezde keibir jaǵdailarda notariýstar arqyly shottarǵa tyiym salynyp kelgen.
Ábenov bul tájiribeni zańsyz ári azamattardyń quqyqtaryn shekteidi dep baǵalady. Onyń pikirinshe, mundai sheshimder tek sot arqyly qabyldanýy tiis.
Sondai-aq buryn buǵattalǵan shottarǵa qatysty máselelerdi qaita qaraý josparlanyp otyr. Bul myńdaǵan azamattyń qarjylyq quqyqtaryn qalpyna keltirýge múmkindik berýi múmkin.
Jalpy, jańa zań bank júiesindegi ashyqtyqty arttyrýǵa jáne azamattardyń qarjylyq qaýipsizdigin qamtamasyz etýge baǵyttalǵan. Depýtattardyń aitýynsha, endi adamdar óz quqyqtaryn qorǵaý úshin naqty quraldarǵa ie bolady.
