Qonaev qalasynyń ákimi Ashat Berdihanovtyń halyqpen turaqty kezdesýleri jalǵasýda. Kezekti basqosýda turǵyn Kenjebolat Baltabaev usqyny qashqan bazarlardy jańartý qajettiligin aityp, shaǵymdandy, dep habarlaidy Dalanews.kz
«1-shi shaǵynaýdanda ornalasqan bazardyń ishi tolǵan konteinerler, usqynsyz, rettilik joq. Odan bólek, bazardyń ishinen únemi sasyq iis shyǵyp turady. Qoqys ýaqytyly tazalanbaidy. Azyq-túlik, et-sút ónimderi ashyq-shashyq satylyp jatyr. Jańbyr jaýǵan kúnderi bazardy aralai almaisyń, aiaq basar jer bolmaidy. Dál osy nysan kóneniń kózi, eskiliktiń jańǵyryǵy bolyp tur. «Jetisý» jáne «Aisha siti» bazarlarynda da ózgertetin dúnie jeterlik», – dedi ol.
Bul túitkilge qatysty qala ákimi jaýap berdi.
«1-shi shaǵynaýdandaǵy bazardyń 10-nan astam iesi bar. Buǵan deiin olarǵa abattandyrý qajettiligi jaiynda sáýlet jáne qala qurylysy bóliminiń mamandary habarlama bergen bolatyn. Bazarǵa birneshe ret monitoringtik top baryp, zerdeleý jumystaryn júrgizdi. Sanitarlyq-epidemiologiialyq baqylaý jáne politsiia basqarmalarynyń mamandarymen kemshilikterdi joiý, bazardy jańǵyrtý jaiynda birlesken is-sharalar qolǵa alyndy. Nysannyń ákimshiligi de habardar», - dedi Ashat Berdihanov.
Sondai-aq ol «Aisha siti» bazary Qapshaǵai qalasy ákimdiginiń 2022 jylǵy qaýlysymen statsionarlyq emes bólshek saýda orny retinde belgilengenin atap ótti. Qazirgi tańda munda 30-dan astam dúńgirshek ornalastyrylýda. «Jabaiy» saýdamen ainalysqandardyń kóbi osy bazarǵa kóshirildi. Senbi saiyn jármeńke uiymdastyrylýda.
«Aisha siti» bazary boiynsha aýyz toltyryp aitarlyqtai jumys atqaryldy dep oilaimyz. Endi «Jetisý» bazarynyń jan-jaǵyn retke keltirý maqsatynda qyzmet etýge niettenip otyrmyz», - dedi shahar basshysy.
Aita keteiik, qala ákiminiń halyqpen kezdesýler kestesi ákimdiktiń resmi saitynda, áleýmettik jelilerdegi paraqshalarynda jariialanady.
