Qonaev qalasynda tótenshe jaǵdai (TJ) rejimin engizý máselesi qarastyrylyp jatyr. Tiisti qaýly jobasy «Ashyq NQA» portalynda jariialandy, dep habarlaidy Dalanews.kz.
Qala ákiminiń sheshim jobasy 2025 jylǵy 16 jeltoqsanǵa deiin qoǵamdyq talqylaýǵa shyǵarylǵan.
Qujatqa sáikes, Qonaev qalasynda kópqabatty turǵyn úilerdiń shatyryn ushyryp áketken qatty jelge bailanysty jergilikti aýqymdaǵy tehnogendik sipattaǵy tótenshe jaǵdai jariialaý josparlanyp otyr.
TJ rejimi engizilgen kezeńde zaqymdanǵan turǵyn úilerdiń shatyrlaryn qalpyna keltirý kózdelgen. Resmi málimetke sai, bul rejim áleýmettik-ekonomikalyq, quqyqtyq jáne ózge de teris saldarǵa ákep soqpaidy.
Qala ákimdiginiń dereginshe, 12 jeltoqsanǵa qaraǵan túni sekýndyna 25 metrge deiin jetken qatty jeldiń saldarynan Qonaevta 30-dan astam avariia tirkelgen. Tabiǵi qolaisyzdyq qalalyq infraqurylymǵa ziian keltirip, birqatar aýdandarda elektr jaryǵy, sý jáne jylý ýaqytsha óshken.
Qala ákimi Ashat Berdihanov shuǵyl jiyn ótkizip, kommýnaldyq qyzmetterge, energetikterge, qutqarýshylar men meditsina qyzmetkerlerine tabiǵi apattyń saldaryn barynsha jedel joiýdy tapsyrdy. Qazirgi tańda apattyń naqty sebepteri anyqtalyp, keltirilgen shyǵyn kólemi baǵalanyp jatyr. Bilik ókilderi jaǵdaidyń baqylaýda ekenin málimdedi.
Qalada qalpyna keltirý jumystary jalǵasýda: mamandar elektr jelilerin jóndep, qulaǵan aǵashtardy tazalap, búlingen qurylymdar men shatyrlardy qalpyna keltirip, kóshelerdi qoqystan aryltyp jatyr.
Turǵyndar jylý men ystyq sýdyń ýaqytsha óshkenine de shaǵymdanǵan. «Jylý ortalyǵy» mekemesiniń túsindirýinshe, túnde elektr qýatynyń qysqa merzimge óshýi saldarynan sý salqyndap ketken, alaida qazir júie qalypty rejimde jumys istep tur, ystyq sýdyń barlyq úilerge tolyq jetýine ýaqyt qajet.
Qarlyǵash shaǵynaýdanynda aýyz sý ýaqytsha óshirilgen. Bul aýmaqta sorǵylardy elektrmen qamtamasyz etetin jelide jóndeý jumystary júrgizilip jatyr.
Qonaev qalasynda turǵyndardyń ótinishterin qabyldaityn eki jedel shtab jumys istep tur. Sonymen qatar, aqparat táýlik boiy «109 jáne Qonaev qalasynyń ákimdigi» WhatsApp tobynda jariialanyp otyrady. Kommýnaldyq qyzmetter kúsheitilgen rejimge kóshirilgen.
