قونايەۆ قالاسىندا توتەنشە جاعداي (تج) رەجيمىن ەنگىزۋ ماسەلەسى قاراستىرىلىپ جاتىر. ءتيىستى قاۋلى جوباسى «اشىق نقا» پورتالىندا جاريالاندى، دەپ حابارلايدى Dalanews.kz.
قالا اكىمىنىڭ شەشىم جوباسى 2025 جىلعى 16 جەلتوقسانعا دەيىن قوعامدىق تالقىلاۋعا شىعارىلعان.
قۇجاتقا سايكەس، قونايەۆ قالاسىندا كوپقاباتتى تۇرعىن ۇيلەردىڭ شاتىرىن ۇشىرىپ اكەتكەن قاتتى جەلگە بايلانىستى جەرگىلىكتى اۋقىمداعى تەحنوگەندىك سيپاتتاعى توتەنشە جاعداي جاريالاۋ جوسپارلانىپ وتىر.
تج رەجيمى ەنگىزىلگەن كەزەڭدە زاقىمدانعان تۇرعىن ۇيلەردىڭ شاتىرلارىن قالپىنا كەلتىرۋ كوزدەلگەن. رەسمي مالىمەتكە ساي، بۇل رەجيم الەۋمەتتىك-ەكونوميكالىق، قۇقىقتىق جانە وزگە دە تەرىس سالدارعا اكەپ سوقپايدى.
قالا اكىمدىگىنىڭ دەرەگىنشە، 12 جەلتوقسانعا قاراعان ءتۇنى سەكۋندىنا 25 مەترگە دەيىن جەتكەن قاتتى جەلدىڭ سالدارىنان قونايەۆتا 30-دان استام اۆاريا تىركەلگەن. تابيعي قولايسىزدىق قالالىق ينفراقۇرىلىمعا زيان كەلتىرىپ، ءبىرقاتار اۋدانداردا ەلەكتر جارىعى، سۋ جانە جىلۋ ۋاقىتشا وشكەن.
قالا اكىمى اسحات بەردىحانوۆ شۇعىل جيىن وتكىزىپ، كوممۋنالدىق قىزمەتتەرگە، ەنەرگەتيكتەرگە، قۇتقارۋشىلار مەن مەديسينا قىزمەتكەرلەرىنە تابيعي اپاتتىڭ سالدارىن بارىنشا جەدەل جويۋدى تاپسىردى. قازىرگى تاڭدا اپاتتىڭ ناقتى سەبەپتەرى انىقتالىپ، كەلتىرىلگەن شىعىن كولەمى باعالانىپ جاتىر. بيلىك وكىلدەرى جاعدايدىڭ باقىلاۋدا ەكەنىن مالىمدەدى.
قالادا قالپىنا كەلتىرۋ جۇمىستارى جالعاسۋدا: ماماندار ەلەكتر جەلىلەرىن جوندەپ، قۇلاعان اعاشتاردى تازالاپ، بۇلىنگەن قۇرىلىمدار مەن شاتىرلاردى قالپىنا كەلتىرىپ، كوشەلەردى قوقىستان ارىلتىپ جاتىر.
تۇرعىندار جىلۋ مەن ىستىق سۋدىڭ ۋاقىتشا وشكەنىنە دە شاعىمدانعان. «جىلۋ ورتالىعى» مەكەمەسىنىڭ تۇسىندىرۋىنشە، تۇندە ەلەكتر قۋاتىنىڭ قىسقا مەرزىمگە ءوشۋى سالدارىنان سۋ سالقىنداپ كەتكەن، الايدا ءقازىر جۇيە قالىپتى رەجيمدە جۇمىس ىستەپ تۇر، ىستىق سۋدىڭ بارلىق ۇيلەرگە تولىق جەتۋىنە ۋاقىت قاجەت.
قارلىعاش شاعىناۋدانىندا اۋىز سۋ ۋاقىتشا وشىرىلگەن. بۇل اۋماقتا سورعىلاردى ەلەكترمەن قامتاماسىز ەتەتىن جەلىدە جوندەۋ جۇمىستارى جۇرگىزىلىپ جاتىر.
قونايەۆ قالاسىندا تۇرعىنداردىڭ وتىنىشتەرىن قابىلدايتىن ەكى جەدەل شتاب جۇمىس ىستەپ تۇر. سونىمەن قاتار، اقپارات تاۋلىك بويى «109 جانە قونايەۆ قالاسىنىڭ اكىمدىگى» WhatsApp توبىندا جاريالانىپ وتىرادى. كوممۋنالدىق قىزمەتتەر كۇشەيتىلگەن رەجيمگە كوشىرىلگەن.
