Qonaevta jylytý qazandyqtary jańartylady. Bul týraly ortalyqtyń ınjeneri Shamıl Gýmarov málimdedi,- dep habarlaıdy Dalanews.kz
«Oblys ortalyǵy mártebesin alǵan sátten bastap Qonaevta qurylys aıtarlyqtaı jandandy, sáıkesinshe, jylý energıasyn tutynýshylar sany da ósti. Osyǵan baılanysty jáne nysannyń qýatyn arttyrý maqsatynda «Jylý ortalyǵy» SHJQ MKK TÚKSH bólimine 4 bý qazandyǵyn aýystyrýǵa ótinim berdi. Nátıjesinde memlekettik satyp alý portaly arqyly tender ótkizilip, qazandyqtar satyp alyndy», – dedi ınjener.
Onyń aıtýynsha, qazandyqtar 2025-2026 jyldardaǵy jylytý maýsymy bastalǵanǵa deıin ornatylady dep josparlanýda.
Sondaı-aq ol byltyr atqarylǵan jumystarǵa da toqtalyp ótti.
«Byltyr qalanyń 2, 4 jáne 5-yqsham aýdandaryndaǵy jylý júıeleri túgel aýystyryldy. Júıeniń jalpy uzyndyǵy - 3,077 shaqyrym. Qosymsha 2 shaqyrymnan astam jylý jelisine aǵymdaǵy jóndeý jasaldy», – dedi Shamıl Gýmarov.
Aıta keteıik, qalada 31 255 abonent ortalyqtandyrylǵan jylytýǵa qosylǵan. «Jylý ortalyǵynda» 10 qazandyq bar: 6 bý jáne 4 sý jylytqysh. Onyń 5-i jumys istep tur, 4-i rezervte.
