قونايەۆتا جىلىتۋ قازاندىقتارى جاڭارتىلادى. بۇل تۋرالى ورتالىقتىڭ ينجەنەرى شاميل گۋماروۆ مالىمدەدى،- دەپ حابارلايدى Dalanews.kz
«وبلىس ورتالىعى مارتەبەسىن العان ساتتەن باستاپ قونايەۆتا قۇرىلىس ايتارلىقتاي جانداندى، سايكەسىنشە، جىلۋ ەنەرگياسىن تۇتىنۋشىلار سانى دا ءوستى. وسىعان بايلانىستى جانە نىساننىڭ قۋاتىن ارتتىرۋ ماقساتىندا «جىلۋ ورتالىعى» شجق مكك تۇكش بولىمىنە 4 بۋ قازاندىعىن اۋىستىرۋعا ءوتىنىم بەردى. ناتيجەسىندە مەملەكەتتىك ساتىپ الۋ پورتالى ارقىلى تەندەر وتكىزىلىپ، قازاندىقتار ساتىپ الىندى»، – دەدى ينجەنەر.
ونىڭ ايتۋىنشا، قازاندىقتار 2025-2026 جىلدارداعى جىلىتۋ ماۋسىمى باستالعانعا دەيىن ورناتىلادى دەپ جوسپارلانۋدا.
سونداي-اق ول بىلتىر اتقارىلعان جۇمىستارعا دا توقتالىپ ءوتتى.
«بىلتىر قالانىڭ 2، 4 جانە 5-ىقشام اۋداندارىنداعى جىلۋ جۇيەلەرى تۇگەل اۋىستىرىلدى. جۇيەنىڭ جالپى ۇزىندىعى - 3،077 شاقىرىم. قوسىمشا 2 شاقىرىمنان استام جىلۋ جەلىسىنە اعىمداعى جوندەۋ جاسالدى»، – دەدى شاميل گۋماروۆ.
ايتا كەتەيىك، قالادا 31 255 ابونەنت ورتالىقتاندىرىلعان جىلىتۋعا قوسىلعان. «جىلۋ ورتالىعىندا» 10 قازاندىق بار: 6 بۋ جانە 4 سۋ جىلىتقىش. ونىڭ 5ء-ى جۇمىس ىستەپ تۇر، 4ء-ى رەزەرۆتە.
