قونايەۆ قالاسىندا جاعاجايلاردى جاڭارتۋ جۇمىستارى باستالىپ، كەيبىر كاسىپكەرلەردىڭ نىساندارى ءسۇرىلىپ جاتىر، دەپ حابارلايدى Dala News.

بۇل تۋرالى قالا اكىمدىگىنىڭ تۇكش ءبولىمىنىڭ باسشىسى تيمۋر اقمىرزايەۆ مالىمدەدى.

ونىڭ ايتۋىنشا، №6 جانە №7 جاعاجايلار شومىلۋ ماۋسىمىنا دەيىن تولىق جاڭارتىلىپ، جاڭا ينفراقۇرىلىممەن جابدىقتالادى. جوبا اياسىندا ۆيزيت-ورتالىق، 50-دەن استام بيزنەس نىسانى، 53 كيىم اۋىستىرۋ ورنى جانە 21 اجەتحانا ورناتىلادى. سونىمەن قاتار بالالار ويىن الاڭدارى، ۆوركاۋت ايماقتارى جانە جاعاجاي سپورتىنا ارنالعان ورىندار سالىنادى.

«بارلىق نىساندار ءبىرىڭعاي ديزاينمەن جاسالادى. قاۋىپسىزدىك پەن كوگالداندىرۋعا دا ەرەكشە كوڭىل بولىنەدى»، – دەدى اقمىرزايەۆ.

جاعاجايعا جاياۋ كىرۋ تەگىن، تەك اۆتوتۇراق ءۇشىن اقى الىنادى. ال بيزنەس ورىندارى سەنىمگەرلىك باسقارۋ ارقىلى كاسىپكەرلەرگە جالعا بەرىلەدى.

قازىرگى تاڭدا جاعاجايدا بۇرىننان جۇمىس ىستەپ كەلگەن 40 كاسىپكەردىڭ نىساندارى بۇزىلىپ جاتىر. ولاردىڭ ىشىندە زاڭ تالاپتارىن تولىق ورىنداعان 25 كاسىپكەرمەن 5 جىلعا كەلىسىمشارت جاسالعان، ال قالعاندارى تالاپتاردى ورىنداعان جاعدايدا عانا قايتا كەلىسىمگە وتىرا الادى.

اكىمدىك مالىمەتىنشە، جاعاجايلاردى جاڭارتۋ جۇمىستارى تۇرعىنداردىڭ انتيسانيتارياعا قاتىستى ءجيى شاعىمدارىنا بايلانىستى قولعا الىنعان.

سونداي-اق سولتۇستىك باعىتتاعى جاعاجاي دا اباتتاندىرىلىپ، الداعى ۋاقىتتا قالاداعى بارلىق كوممۋنالدىق جاعالاۋلار كەزەڭ-كەزەڭىمەن جاڭارتىلماق.