Qonaev qalasynyń ákimi Ashat Berdihanov Sheńgeldi aýyldyq okrýgine qarasty eldimekenderge baryp qaitty, – dep habarlaidy Dalanews.kz Almaty oblysy ákiminiń baspasóz qyzmetine silteme jasap.
Bul joly basymdyq áleýmettik nysandarǵa berildi. Aldymen ákim Sarybulaq pen Kerbulaq aýyldarynda ornalasqan bloktyq-modýldy keshenniń jumysymen tanysty.
Meditsinalyq qyzmetkerler atalǵan nysandardy elektr qýatymen jylytý jetkiliksiz ekenin aityp, shaǵymdandy. Sondyqtan ákim aýyl ákimi men aýrýhana direktoryna qatty nemese dizel otynymen jylytý máselesin qarastyrýdy tapsyrdy.
Al Sheńgeldidegi ambýlatoriianyń kúrdeli jóndeý jumystarymen tanysqan shahar basshysy nysandy ýaqytyly qoldanysqa berýdi tapsyrdy.
Sonymen qatar ol aýyldardaǵy sport jáne vorkaýt alańdarynyń tozyp turǵanyna da nazar aýdardy.
– Buryn osy alańdardy salǵan merdiger kompaniianyń kepildik merzimine sáikes, aǵymdaǵy jóndeý jasalýy tiis. Sportsúier jastarǵa jaǵdai jasap berýimiz kerek. Suranysty qamtamasyz etý – mańyzdy, – dedi Ashat Berdihanov.
Al Aqózektegi mekteptiń qabyrǵasy jarylyp ketýine bailanysty ákim ǵimaratty kúrdeli jóndeýden ótkizýge qajetti qujattardy daiyndaýdy tapsyrdy. Shahar basshysy Kerbulaq, Sarybulaq, Aqózek pen Sheńgeldidegi mektep ashanalaryn da tekserip shyqty, mázirdegi taǵamnan aýyz tidi.
– Jalpy jaman emes. Alaida, balalardyń qaýipsizdigi, durys tamaqtanýy árdaiym basty nazarda bolýy shart. Sanitarlyq talaptarǵa sáikestigi týraly qujattaryńyzdy túgendep, tamaqtyń sapasyn kúndelikti baqylaýda ustańyzdar, – dedi ákim.
Sheńgeldi aýyldyq okrýginiń ákimi Maqsat Jaziev Ashat Berdihanovqa sharýalardyń túitkili, Aqózektegi selden qorǵaityn eki kópirdi kúrdeli jóndeýden ótkizý týraly usynysyn aitty.
Shahar basshysy bolsa, barlyq kókeikesti suraqtarǵa arnalǵan aýqymdy jiyn uiymdastyrylyp, talqylanyp, sheshim shyǵarylatynyn aitty.
