قونايەۆ قالاسىنىڭ اكىمى اسحات بەردىحانوۆ شەڭگەلدى اۋىلدىق وكرۋگىنە قاراستى ەلدىمەكەندەرگە بارىپ قايتتى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
بۇل جولى باسىمدىق الەۋمەتتىك نىساندارعا بەرىلدى. الدىمەن اكىم سارىبۇلاق پەن كەربۇلاق اۋىلدارىندا ورنالاسقان بلوكتىق-مودۋلدى كەشەننىڭ جۇمىسىمەن تانىستى.
مەديسينالىق قىزمەتكەرلەر اتالعان نىسانداردى ەلەكتر قۋاتىمەن جىلىتۋ جەتكىلىكسىز ەكەنىن ايتىپ، شاعىمداندى. سوندىقتان اكىم اۋىل اكىمى مەن اۋرۋحانا ديرەكتورىنا قاتتى نەمەسە ديزەل وتىنىمەن جىلىتۋ ماسەلەسىن قاراستىرۋدى تاپسىردى.
ال شەڭگەلدىدەگى امبۋلاتوريانىڭ كۇردەلى جوندەۋ جۇمىستارىمەن تانىسقان شاھار باسشىسى نىساندى ۋاقىتىلى قولدانىسقا بەرۋدى تاپسىردى.
سونىمەن قاتار ول اۋىلدارداعى سپورت جانە ۆوركاۋت الاڭدارىنىڭ توزىپ تۇرعانىنا دا نازار اۋداردى.
– بۇرىن وسى الاڭداردى سالعان مەردىگەر كومپانيانىڭ كەپىلدىك مەرزىمىنە سايكەس، اعىمداعى جوندەۋ جاسالۋى ءتيىس. سپورتسۇيەر جاستارعا جاعداي جاساپ بەرۋىمىز كەرەك. سۇرانىستى قامتاماسىز ەتۋ – ماڭىزدى، – دەدى اسحات بەردىحانوۆ.
ال اقوزەكتەگى مەكتەپتىڭ قابىرعاسى جارىلىپ كەتۋىنە بايلانىستى اكىم عيماراتتى كۇردەلى جوندەۋدەن وتكىزۋگە قاجەتتى قۇجاتتاردى دايىنداۋدى تاپسىردى. شاھار باسشىسى كەربۇلاق، سارىبۇلاق، اقوزەك پەن شەڭگەلدىدەگى مەكتەپ اسحانالارىن دا تەكسەرىپ شىقتى، مازىردەگى تاعامنان اۋىز ءتيدى.
– جالپى جامان ەمەس. الايدا، بالالاردىڭ قاۋىپسىزدىگى، دۇرىس تاماقتانۋى ءاردايىم باستى نازاردا بولۋى شارت. سانيتارلىق تالاپتارعا سايكەستىگى تۋرالى قۇجاتتارىڭىزدى تۇگەندەپ، تاماقتىڭ ساپاسىن كۇندەلىكتى باقىلاۋدا ۇستاڭىزدار، – دەدى اكىم.
شەڭگەلدى اۋىلدىق وكرۋگىنىڭ اكىمى ماقسات جازييەۆ اسحات بەردىحانوۆقا شارۋالاردىڭ تۇيتكىلى، اقوزەكتەگى سەلدەن قورعايتىن ەكى كوپىردى كۇردەلى جوندەۋدەن وتكىزۋ تۋرالى ۇسىنىسىن ايتتى.
شاھار باسشىسى بولسا، بارلىق كوكەيكەستى سۇراقتارعا ارنالعان اۋقىمدى جيىن ۇيىمداستىرىلىپ، تالقىلانىپ، شەشىم شىعارىلاتىنىن ايتتى.
