Kúni keshe ǵana eń jas otyzdan asqan Aýyl sharýashylyǵy vitse-ministri Ábilhaiyr Tamabek qyzmetinen bosady. Ol Jambyl oblysyna qaitady deidi, – DALA INSIDE derekkózi.
"Tamabek Sol jaǵalaýdaǵy týsovkaǵa syimady. Sebebi jer "lobbisterimen", latifýndistermen ashyq kúres júrgizdi. Ásirese Respublica partiiasyna unamai qaldy"
Jas qasqyr Ábilhaiyr Tamabek Májilistiń kezekti bir otyrysynda Respublica partiiasynyń tóraǵasy, agrarlyq komitet múshesi Aidarbek Qojanazarovpen ashyq tartysqa ketip edi.
Sol zaldaǵy tartys kabinetaralyq intrigalarǵa ulasqanyn estigenbiz. Qojanazarov qatty renjip, Májilis depýtattarynan birtindep qol jinap, Tamabekten qutylýdyń joldaryn izdegen. Tipti, kópshilik aldynda keshirim suratýǵa da tyrysqan kórinedi.
Sol oqiǵadan keiin Tamabek Májilis jinalystaryna qatyspaityn boldy. Al depýtat Qojanazarovtyń jer máselesindegi álsiz tusy – basqarýyndaǵy 400 myń gektar jeri bolyp otyr. Tamabek qyzmetten ketkennen keiin jinalysqa kelgen ministr, vitse-ministrlerdi "sabap alýǵa" úirengen depýtattardyń tynysy keńeidi.
Aqparat quraldary eks vitse-ministrdiń eki jylda memleket menshigine on million gektar jer qaitarý, sol jerdi sharýalarǵa ádil bólý, sýbsidiia salasyndaǵy ózgeristerge batyl qadamdar jasaý siiaqty istermen este qalǵanyn jazyp jatyr. Prezident Toqaev batyl qadamdar kerek dese de, qoi terisin jamylyp Parlamentke kirip alǵan latifýndisterge "batyl qadamdar" múlde unamady.
