«Ana tili» gazetine bergen suhbatynda Qazaqstan Prezidenti Qasym-Jomart Toqaev 2024 jylǵy ishki jáne syrtqy saiasattaǵy mańyzdy oqiǵalarǵa jan-jaqty baǵa berip, elimizdiń áleýmettik-ekonomikalyq damýyn qorytyndylady.
Negizgi oqiǵalardyń biri qumar oiyndarǵa táýeldilikpen kúresýge baǵyttalǵan zańnyń qabyldanýy boldy. Qujatta býkmekerlik keńseler men býkmekerlik dúkenderdi jarnamalaýǵa tyiym salý, kámeletke tolmaǵandardy qumar oiyndarǵa tartqany úshin ákimshilik jazalar engizý, boryshkerlerdiń biryńǵai tizilimine engizilgen tulǵalardyń olarǵa qatysýyna tyiym salý siiaqty erejelerdi aitarlyqtai qataitady. Bul sharalar qoǵamǵa úlken qaýip tóndiretin qumar oiyndarǵa táýeldilik aýqymyn barynsha azaitýǵa baǵyttalǵan.
2024 jyldyń sáýirinde Májilis zań jobasyn birinshi oqylymda maquldady. Usynylǵan erejege sáikes, qumar oiyndarǵa tek 25 jasqa tolǵan adamdar qatysa alady. Ǵimarattardyń qasbetterine kazinolar men býkmekerlik keńseler týraly jarnamalardy ornalastyrýǵa tyiym salynady, al eGov platformasy arqyly azamattar qumar oiyndarǵa qatysýǵa 10 jylǵa tyiym sala alady. Sonymen qatar, nesiesi nemese alimenti tólenbegen azamattarǵa bás tigýge ruqsat berilmeidi.
Eńbek jáne halyqty áleýmettik qorǵaý ministrliginiń málimeti boiynsha, Qazaqstanda 350 myńnan astam adam qumar oiyndarǵa táýeldi bolsa, olardyń aitarlyqtai bóligin jastar quraidy. Ranking.kz saraptamalyq agenttiginiń málimetinshe, 2023 jyly azamattardyń oiyn biznesine jumsaǵan shyǵyny 370 milliard teńgeden asty.
Jastar ǵylymi ortalyǵynyń zertteýleri qumar oiyndarǵa tartylǵan jastardyń sanynyń artqanyn kórsetedi: ony jaman ádet dep sanaityndardyń úlesi 2022 jylǵy 1,2%-dan 2023 jyly 3%-ǵa deiin ósti.
2024 jyldyń basynan beri memlekettik organdar qumar oiyndarynyń jarnamasyna qatysty 5 myńnan astam veb-saittar men siltemelerdi buǵattady. 2021 jyldan beri 36 oiyn mekemesiniń litsenziiasynan aiyryldy, onyń ishinde 28 býkmekerlik keńse men alty býkmekerlik dúken bar.
Qumar oiyndarǵa táýeldilikke qarsy kúres týraly zańnyń qabyldanýy qazaqstandyqtardyń áleýmettik ál-aýqatyn qorǵaýdaǵy mańyzdy qadam boldy. Bul sharalar halyqtyń osal toptary úshin táýekelderdi barynsha azaitatyn jaǵdailar jasaýǵa baǵyttalǵan.
Aidana AKESINA, QR Prezidenti janyndaǵy Qazaqstannyń strategiialyq zertteýler institýty Strategiialyq taldaý departamentiniń bas sarapshysy
