Memleket basshysy Qasym-Jomart Toqaev Buqaralyq aqparat quraldary qyzmetkerleri kúnine arnalǵan saltanatty rásimge qatysyp, jýrnalisterdi kásibi merekesimen quttyqtady, dep habarlaidy dalanews.kz.
Prezident jýrnalistikany qoǵamnyń úni ári memlekettiń mańyzdy tirekteriniń biri dep atap, aqparat salasy ókilderiniń el damýyndaǵy róline joǵary baǵa berdi.
«Bul kásibi merekeniń elimiz úshin orny erekshe. Jýrnalistiń basty missiiasy – qoǵamdy aqparattandyrý, halyqtyń muń-muqtajyn jetkizý. Sizder jurtshylyqty tolǵandyrǵan eń ózekti máselelerdi kóterip, el múddesine adal qyzmet etip kelesizder. Qazirgi jahandyq tehnologiialar dáýirinde buqaralyq aqparat quraldaryna halyqty jedel, sapaly ári shynaiy aqparatpen, obektivti saraptamamen qamtamasyz etý mindeti júktelip otyr», – dedi Qasym-Jomart Toqaev.
Prezidenttiń aitýynsha, jańa tsifrlyq platformalardyń qarqyndy damýyna qaramastan, dástúrli buqaralyq aqparat quraldarynyń mańyzy joiylmaidy.
«Biz dástúrli gazetter men telearnalardyń zaman talabyna sai ózgerip, jańa formattardy meńgerip, innovatsiialyq mýltimedialyq platformalarǵa ainalyp jatqanyn kórip otyrmyz. Sondyqtan dástúrli BAQ óziniń qoǵamdaǵy mańyzdy ornyn saqtaidy», – dedi Memleket basshysy.
Toqaev jýrnalisterdiń jańa Konstitýtsiiany qabyldaý kezeńindegi eńbegine de toqtaldy.
«Qazaqstandyq jýrnalister ózderine júktelgen jaýapkershilikti tereń sezinip, kásibi mindetterin minsiz atqardy. Naýryz aiynda biz konstitýtsiialyq reformany sátti ótkizdik. Jalpyhalyqtyq referendýmda azamattarymyz tarihi tańdaý jasap, elimizdiń bolashaǵyn aiqyndady. Sonyń nátijesinde jańa Konstitýtsiia qabyldandy», – dedi Prezident.
Saltanatty jiyn barysynda BAQ salasynyń birqatar qyzmetkeri memlekettik nagradalarmen marapattaldy. Sonymen qatar 66 jýrnalistke jańa páterdiń kilti tabystaldy. Bul bastama aqparat salasy qyzmetkerlerin áleýmettik qoldaý sharalarynyń biri retinde baǵalandy.
