Reseidiń jabyq kanaldar arqyly Qazaqstannan 50 myń tonna AI-92 benzini boiynsha usynyspen shyqqanyn Reuters jazǵan bolatyn. Insaiderlerdiń sózinshe onyń eki baǵyty usynylǵan. Birinshisinde, Resei Qazaqstannan daiyn benzin satyp alady. Ekinshisinde, reseilik munaidy qazaqstandyq munai óńdeý zaýyttarynda óńdep, ózderine tasidy.
"Astana áli Máskeýge jaýap bermedi. Biraq jabyq esik jaǵdaiyndaǵy keńeste benzinniń óteýi retinde aviakerosin suraý boiynsha nusqa barlyq taraptarǵa unap otyr. Sebebi elimizdi aviaotyn tapshylyǵy qatty qysyp barady. Jazǵy demalys kezeńi bastalǵanda bul defitsit órshi tústi. Aviakerosin jetispese, aviahabqa ainalý boiynsha jospardyń barlyǵy buzylmaq", - deidi, DALA INSIDE derekkózi.
Qazaqstan jylyna shamamen 724–726 myń tonna aviakerosin óndiredi. Al eldiń jyldyq suranysy 1,1–1,2 mln tonnaǵa jetken. Iaǵni jyl saiyn 350–450 myń tonna kóleminde tapshylyq importpen jabylady. Onyń basym bóligi Reseiden kelip júrgen edi.
Aldaǵy shilde aiynda jaǵdai kúrdelene túsýi múmkin. 26 maýsym men 15 shilde aralyǵynda Atyraý munai óńdeý zaýyty josparly jóndeýge toqtaidy. Osy kezde jazǵy demalys maýsymynyń sharyqtaý kezeńine kelemiz de, turaqty jáne charterlik reister sany kóbeiedi. Sonyń saldarynan Qazaqstanda aviakerosin tapshylyǵy kúsheiedi degen boljam bar.
Reseide aviakerosin óndirisi shamamen 30 paiyzǵa qysqardy da, qalǵan rezervti Máskeý importqa shyǵarmai, ózinde strategiialyq zapas retinde ustamaq niette. Qazaqstan odan kelisilgen import kólemin toqtatpaýdy talap etpek. 50 myń tonna benzin osy kelissózde qoldanatyn rychagqa ainalyp otyr. Ne bolsa da, Qazaqstan daiyn benzin bermeidi. Tek svop almasý arqyly Batys-Qazaqstandaǵy shaǵyn munai óńdeý zaýytynyń qýatyn usynýy múmkin.
