Jýrnalist ári qoǵam belsendisi Lázzat Asanova Túrkistan oblysy Shardara aýdany Kóksý aýylynda biýdjet qarjysyna salynǵan eki nysannyń qazirgi jai-kúiin synǵa aldy, dep habarlaidy dalanews.kz.
Onyń aitýynsha, aýyldaǵy ortalyq saiabaq pen sport alańyna biýdjetten jalpy 43 million teńgeden astam qarjy bólingen. Onyń ishinde ortalyq saiabaqqa – 19 million teńge, al sport alańyna – 24 million teńge jumsalǵan.
"Joba boiynsha saiabaqta sahna, altybaqan, kiiz úiler men demalys aimaǵy bolýy tiis bolǵan. Alaida búginde kiiz úiler joq, altybaqan tolyq aiaqtalmaǵan, al saiabaqtyń ózi qaraýsyz qalǵandai áser qaldyrady", - dedi ol.
2024 jyly paidalanýǵa berilgen sport alańynyń da qazirgi jai-kúii kóńil kónshitpeidi. Belsendiniń sózinshe, arada kóp ýaqyt ótpei jatyp sport qurylǵylary tozyp, týrnik pen brýsialar eskire bastaǵan.
"Eń basty suraq – bul nysandardy qabyldap alǵan komissiia qaida qarady? Halyqtyń aqshasyna salynǵan nysandar osyndai jaǵdaida bolsa, oǵan tek merdiger ǵana emes, qabyldaý aktilerine qol qoiǵan jaýapty tulǵalar da jaýap berýi tiis", - dedi Lázzat Asanova.
Sondai-aq ol quzyrly organdardy atalǵan jobalardy jan-jaqty tekserýge shaqyrdy.
"Memlekettik aýdit, prokýratýra jáne Sybailas jemqorlyqqa qarsy qyzmet bul jobalardy tolyq tekserip, bólingen qarjynyń ár teńgesine quqyqtyq baǵa berýi qajet. Halyqtyń aqshasy - halyqtyń amanaty. Onyń ár teńgesi úshin jaýapkershilik bolýy kerek", - dep málimdedi qoǵam belsendisi.
