Qazaqstan musylmandary dini basqarmasy (QMDB) birqatar meiramhana men dámhanalarda aýyzashar máziriniń baǵasy sharyqtap ketkenine alańdaýshylyq bildirdi, dep habarlaidy Dalanews.kz.
“Ókinishke qarai, keiingi ýaqytta elimizdegi keibir meiramhana, dámhana jáne ashanalarda aýyzashar máziriniń baǵasy tym joǵary. Bul qoǵamda túsinispeýshilik týdyryp otyr”, – delingen QMDB málimdemesinde.
Osyǵan bailanysty basqarma qoǵamdyq tamaqtaný oryndaryn qarapaiym ári qoljetimdi aýyzashar mázirin usynýǵa shaqyrdy. QMDB qasietti Ramazan aiynyń basty máni qarapaiymdylyq pen qaiyrymdylyqqa negizdelgenin eske saldy.
Sondai-aq basqarma aýyzashar uiymdastyrýda ysyrapshylyq pen baǵa básekesinen aýlaq bolýdyń mańyzdylyǵyn atap ótti.
“Islamda ysyrap etý quptalmaidy. Quranda: “…ishińder, jeńder, biraq ysyrap etpeńder. Rasynda, Ol (Alla) ysyrap etýshilerdi áste unatpaidy” (Aǵraf súresi, 31-aiat)”, – delingen málimdemede.
QMDB Ramazan aiynda jasalǵan árbir izgi istiń erekshe saýapqa keneltetinine nazar aýdaryp, meiramhana men dámhana ielerin qasietti aida qoljetimdi ári qarapaiym aýyzashar mázirin usynýǵa shaqyrdy.
Buǵan deiin kópshilik arasynda "tiktoker-imam" atalyp ketken Nurlan Baijigituly “Almaty aqshamy” gazetine bergen suhbatynda qazaqtar aýyzashar berýdi dastarhan básekesine ainaldyryp jibergeni týraly aitqan edi.
Imamnyń aitýynsha, aýyzashardyń negizgi máni – qarapaiymdylyqta, berekeli dastarhanda, adamdardyń shynaiy yqylas-peiilinde jatyr.
Alaida sońǵy kezde aýyzashar berý bailyq pen áleýmettik mártebeni kórsetýdiń bir quralyna ainalǵan.
"Biz aýyzashardy jarysqa ainaldyryp jiberdik. Bir kúni maǵan bir oblystyń ákimi habarlasyp, "700 adamǵa aýyzashar jasaimyn" dedi. Men odan: "Sizge jarnama kerek pe?" dep suradym. Ol "joq, kerek emes" dedi.
Bizde aýyzashar bergen sheneýnikterdi orynsyz dáripteý, maqtaý ádetke ainalǵan. Sonda halyqty bir ret tamaqqa shaqyrmasa, olar ashtan qatyp qalatyn siiaqty. Shyn máninde, halyq bul aýyzasharǵa qarap otyrǵan joq. Sondyqtan mundai is-sharany maqtanysh ne básekege ainaldyrý durys emes. Aýyzashardyń máni – shynaiy yqylasta", – deidi imam.
Nurlan imam sondai-aq aýyzashar berý úshin halyqtyń qaryzǵa nemese nesiege batyp jatqanyna alańdaitynyn jetkizdi.
"Bir qaryzdy jabamyn dep, ekinshi qaryzdy moiynǵa ilýdiń eshqandai jaqsylyǵy joq. Hadiste de: "aýyzasharǵa bir jutym sý men qurma bolsa da jetkilikti" dep aitylady. Aýyzashardyń berekesi dastarhannyń moldyǵynda emes, adamnyń shynaiy nietinde", – dedi ol.
Imamnyń sózinen túsinetinimiz, Ramazan aiynda as ta tók dastarhan emes, qarapaiymdylyq, shynaiy yqylas jáne imandylyq aldyńǵy orynǵa shyǵýy tiis. Bul qazaq halqynyń tól qundylyqtarymen tolyq úilesetin kózqaras.
