Qarjy monitoringi agenttigi qazaqstandyqtardyń tárkilengen aktivterin saqtaýǵa arnalǵan kriptoámiian ashty. Bul týraly atalǵan agenttik tóraǵasynyń orynbasary Jeńis Elemesov málimdedi, dep habarlaidy Dalanews.kz.
Májilis otyrysynda depýtat Oljas Quspekov 2024 jyly Qarjylyq monitoringi agenttigi jalpy ainalymy 60 mlrd teńgeni quraityn 36 zańsyz kripto almastyrý ornynyń kózin joiǵanyn eske saldy. Sol kezde 2,5 mlrd teńgeniń aktivteri buǵattalyp, tárkilengen. Depýtat bul rette memlekettik mehanizmniń joqtyǵyn eske sala otyryp, agenttik tárkilengen kriptoaktivterdi qalai saqtaitynyn surady.
"Bizdiń tájiribemiz bar. Biz ony Belarýs eli úlgisinen aldyq. Agenttiktiń Binance birjasynda kripto ámiiany bar. Tiisinshe, tsifrlyq aktivter túrinde qandai da bir zańsyz qylmystyq kirister anyqtalǵan kezde, biz olardy agenttiktiń ámiianyna aýdaratyndai múmkindigimiz bar. Sot úkiminen keiin, eger olar tárkilenýge jatsa, memleket kirisine ótetin bolady", - dedi Elemesov.
Onyń aitýynsha, agenttik qarjy piramidasy boiynsha tsifrlyq aktivterdi buǵattaǵan. Bul rette kúdiktilerdiń qarajaty sheteldik birjada jatqan. Agenttik bul zańsyz qarajatty Qazaqstanǵa qaitara alǵan. Qazir zardap shekkenderge keltirilgen zalaldy óteý rásimi júrip jatyr.
Buǵan deiin saitymyzda "Májilis depýtaty Ulttyq bank janynan kriptovaliýtalardy saqtaityn memlekettik rezerv qurýdy usyndy" degen maqala jariialanǵan bolatyn. Sondai-aq bizdiń saitymyzdan "1,5 mln qazaqstandyq kriptovaliýtanyń kóleńkeli naryǵynda júr. Ulttyq bank ne usynady" degen materialmen de tanysa otyryńyzdar.
