Prezident Qasym-Jomart Toqaev Qarjylyq monitoring agenttiginiń tóraǵasy Janat Elimanovty qabyldady. Kezdesýde agenttiktiń 2026 jyldyń birinshi jartyjyldyǵyndaǵy jumysynyń qorytyndylary tanystyryldy, dep habarlaidy dalanews.kz.
Janat Elimanovtyń málimetinshe, esepti kezeńde 496 qylmystyq is boiynsha tergeý aiaqtalyp, jábirlenýshilerge keltirilgen 22,6 mlrd teńge kólemindegi shyǵyn ótelgen.
Sondai-aq jeti qylmystyq toptyń, onyń ishinde tórt transulttyq toptyń qyzmeti toqtatylyp, 176 mlrd teńgeden astam qarajatty zańsyz qolma-qol aqshaǵa ainaldyrǵan 44 jeli áshkerelengen.
Agenttik esirtki biznesi men alaiaqtyqtan túsken tabysty zańdastyrýǵa paidalanylǵan 12 jasyryn kriptoaiyrbastaý pýnktin joiyp, óz esepshottary arqyly 113 mlrd teńge ótkizgen 36 dropperlik topty anyqtaǵan.
Sonymen qatar TMD elderi aýmaǵynda alǵash ret uialy bailanys operatorlarynyń jumysyn imitatsiialaityn jáne fishingtik SMS-habarlamalardy jappai taratatyn arnaiy qurylǵyny paidalanǵan kúdiktiler ustalǵan.
Qarjylyq monitoring agenttigi biýdjet qarajatyn baqylaý barysynda 52 infraqurylymdyq joba boiynsha 279 mlrd teńgeniń negizsiz jumsalýyna jol bermegenin habarlady. Budan bólek, ǵylymi ázirlemelerdi kommertsiialandyrý kezinde 10 mlrd teńge kólemindegi memlekettik qarjynyń jymqyrylý qaýpi anyqtalǵan.
Vedomstvonyń málimetinshe, Mindetti áleýmettik meditsinalyq saqtandyrý qorynan zańsyz qarajat alý úshin jekemenshik klinikalar 140 myń azamattyń jalǵan tirkeý derekterin paidalanǵan.
Aldyn alý sharalary aiasynda zańsyz oiyn biznesine qatysty 9 myń sait pen akkaýnt, alaiaqtyq maqsatynda ashylǵan 2,3 myń internet-resýrs jáne 35 myńnan astam qatysýshysy bar 25 chattyń qyzmeti toqtatylǵan.
Janat Elimanovtyń aitýynsha, qarjylyq saýattylyqty arttyrýǵa baǵyttalǵan is-sharalarǵa 245 myńnan astam azamat qatysqan. Sonymen qatar salalyq zańnamany jetildirý nátijesinde Qazaqstannyń FATF-tyń tórt negizgi usynymy boiynsha reitingtegi kórsetkishi jaqsarǵan.
Kezdesý sońynda Memleket basshysy Qarjylyq monitoring agenttiginiń qyzmetine qatysty birqatar naqty tapsyrma berdi.
