Biyl kásipker Tórsenǵali Alagózov Qazaqstandaǵy eń aýqatty adamdardyń qataryna endi, dep habarlaidy Dalanews.kz.
Forbes
Forbes málimetinshe, 1990-jyldardyń sońynda alkogolsiz sýsyndar óndiretin iri kásiporyndardyń birin qurǵan 55 jastaǵy kásipkerdiń bailyǵy 130 million AQSh dollaryn quraidy. Bul tizimde ol – jańadan engen qatysýshy jáne 61-orynǵa jaiǵasqan. Telegram-arna Shishkin_like málimetinshe, bir jyl ishinde ol eki iri aktiv satyp alǵan – Shymkent syra zaýyty men JFood Kazakhstan kompaniiasy.
«Galanz Bottlers» AQ
Salyqtar: 2015 jyldan beri 29,4 mlrd teńge. Aqparat kózderi bul kompaniiany Alagózovtiń basty aktivi dep ataidy. Kásiporyn 1998 jyly qurylǵan. 2023 jyly «Galanz Bottlers» tabysy 58 mlrd teńgeni qurady. Onyń 4 óndiristik alańy men 6 quiý jelisi bar. Kompaniia aiyna 26,8 mln litr sýsyn óndire alady, ónim assortimenti – 27 ataýdan turady.
Aita ketý kerek, Tórsenǵali Alagózov – kompaniianyń jalǵyz quryltaishysy emes. 2023 jyldyń qarashasynan bastap quryltaishylar tiziminde kásiporyn direktory Ihtiiar Zaýrbekov te bar. Sondai-aq, qujattarda «Galanz» óndiristik kompaniiasy» JShS týraly málimetter bar, ol resmi túrde júk kóligi men temirjol tasymaly qyzmetimen ainalysady. Onyń iesi de – Alagózov. 2015 jyldan beri kompaniia memlekettik kiris organdaryna shamamen 13,7 mln teńge aýdarǵan.
«JFood Kazakhstan» JShS
Salyqtar: 2015 jyldan beri shamamen 8 mlrd teńge. Salalyq birlestikterdi esepke almaǵanda, enshiles kásiporyndardyń bir jyldaǵy aýdarymdary – 1,3 mlrd teńgeden asady. Alagózov bul kompaniiany 2024 jyldyń aqpanynda Ǵalymjan Esenovten satyp alǵan.
Kompaniia qurylymy – birneshe uiymnan turatyn top. Oǵan bas kásiporynnan bólek, un jáne makaron ónimderin óndirýmen, kóterme jáne bólshek saýdamen, distribýtsiiamen, astyq saqtaýmen jáne jyljymaityn múlikti jalǵa berý ári basqarýmen ainalysatyn 5 enshiles uiym kiredi.
Bas kásiporyn men onyń enshiles kásiporyndary ár jyldary memlekettik satyp alýlar boiynsha jalpy somasy 182,2 mln teńgege kelisimsharttar jasaǵan. Aita keteiik, Alagózov bul JShS-ny jeke ózi de, «Galanz Bottlers» AQ arqyly da ielenip otyr.
«Shymkent syra zaýyty» JShS
Salyqtar: 2016 jyldan beri 15,9 mlrd teńge. Aktiv Alagózovtiń ieligine 2023 jyldyń mamyrynda ótken. 2021 jyldan 2024 jylǵa deiin zaýyt Timýr Janabaevtyń menshiginde bolǵan. Eske salaiyq, bul kásiporyn – kezinde Toqtar Tóleshovke tiesili bolǵan «Shymkentpivo» JShS-niń quqyqtyq murageri. Alagózov bul zaýytty jýrnalist ári telejúrgizýshi Dinara Sátjanǵa bergen suhbatynda satyp alý qunyn 8 mlrd teńge dep ataǵan. Zaýyt 1976 jyly qurylǵan. Ony satyp alǵannan keiin kásipker bul nysanǵa 40 mln AQSh dollary kóleminde investitsiia salǵan (Forbes.kz).
«Feniks kompani» JShS
Salyqtar: 2015 jyldan beri 6,7 mlrd teńge. JShS 2013 jyly tirkelgen, azyq-túlik, sýsyn jáne temeki buiymdaryn kóterme saýdada satýmen ainalysady. Alagózov kompaniiany 2023 jyldyń sáýirinde ielengen.
«Adal Su» JShS
Salyqtar: 2015 jyldan beri 128 mln teńge. Qujattar boiynsha, kompaniia 2022 jyldan bastap Almatydaǵy Altai-2 yqshamaýdanyndaǵy jyljymaityn múlikti jalǵa berý jáne basqarýmen ainalysady (bul nysan «Galanz Bottlers» AQ ǵimarattarynyń biri bolýy múmkin). Alagózovtiń bul jobadaǵy seriktesi – kásipker Tleýkabyl Abdýlin.
Alagózovtiń basqa kompaniialary
«Chemolgan Food Station» JShS – baspa óndirisiniń keibir túrlerimen ainalysady. Buǵan deiin – jyljymaityn múlikti jalǵa berý jáne basqarýmen ainalysqan. Qazir kásiporynnyń jalǵyz quryltaishysy – Alagózov. 2010–2014 jyldary seriktesi Tleýkabyl Abdýlin bolǵan. Kompaniia sońǵy 10 jylda salyqty óte turaqsyz tólegen. Negizgi bóligi 2024–2025 jyldary tólengen. 2015 jyldan beri jalpy tólem – 246,6 mln teńge.
«Arbasha» JShS – júk kóligi tasymalymen ainalysady. Tórsenǵali Alagózov kompaniianyń quryltaishysy retinde 2023 jyldyń jeltoqsanynda tirkelgen. Burynǵy iesi – onyń aǵasy Asqar Alagózov. Bul kompaniia da negizgi salyq tólemderin 2024–2025 jyldary jasaǵan – shamamen 3 mlrd teńge. 2015 jyldan beri barlyǵy – 4,4 mlrd teńge tólengen.
«Mercury.kz» JShS – ártúrli taýarlardy kóterme satýmen ainalysady. Tórsenǵali men Baian Alagózovter bul kompaniiany 2023 jyldyń tamyzynan bastap birlesip ielenip otyr. Buǵan deiin quryltaishylar qatarynda Svetlana men Janiia Dáýletáli bolǵan. 2018 jyldan beri salyq kólemi – 57,3 mln teńge.
«Severnoe siianie LTD» JShS – turmystyq tońazytqyshtar men muzdatqyshtar shyǵarady jáne dúkennen tys bólshek saýdamen ainalysady (Adata.kz). Qazirgi ýaqytta Alagózov – jalǵyz quryltaishy. Buǵan deiin kompaniia ieleriniń qatarynda burynǵy direktor Nikolai Kim bolǵan. Salyqtar: 2015 jyldan beri – 162,7 mln teńge. Biraq 2018–2022 jyldar aralyǵynda tólemder jasalmaǵan.
Buǵan deiin Tórsenǵali Alagózovtiń burynǵy jary kásipkerdiń «Galanz Bottlers» kompaniiasymen bailanysty oqiǵaǵa qatysty óz kózqarasyn bildirip, turǵyn úi taratýǵa qatysty qaiyrymdylyq aktsiiasy jóninde de pikir aitqan bolatyn.
