Azamat Qaldybekov basqa jumysqa aýysýyna bailanysty Almaty qalasy ákiminiń orynbasary qyzmetinen bosatyldy, dep habarlaidy Dalanews.kz
Qalalyq ákimdiktiń málimetinshe, ol bul qyzmettegi jumysyn 29 qazanda aiaqtaǵan. Qaldybekov ishki saiasat, mádeniet, sport, bilim, jastar saiasaty jáne din máselelerine jetekshilik etken.
Onyń ornyna buǵan deiin QR Prezidenti Ákimshiliginiń ishki saiasat bólimin basqarǵan Abzal Núkenov taǵaiyndaldy.
Almaty ákimdigindegi senimdi derekkózdiń habarlaýynsha, Azamat Qaldybekov Bostandyq aýdanynyń ákimi bolyp taǵaiyndalýy múmkin.
Eske salaiyq, Azamat Qaldybekov 2024 jyldyń shilde aiynan beri Almaty qalasy ákiminiń orynbasary qyzmetin atqardy. Buǵan deiin, 2020 jyldyń qańtarynan bastap megapolistiń Alataý aýdanynyń ákimi bolǵan.
Azamat Qaldybekov 1984 jyly dúniege kelgen. Ál-Farabi atyndaǵy Qazaq ulttyq ýniversitetin «halyqaralyq quqyq» mamandyǵy boiynsha támamdaǵan. «Bolashaq» baǵdarlamasy arqyly AQSh-tyń Soltústik Karolina shtatyndaǵy Diýk ýniversitetinde quqyq magistri dárejesin alǵan.
Eńbek jolyn 2007 jyly Almaty qalasy Bostandyq aýdandyq №2 sotynda jetekshi maman qyzmetinen bastaǵan. Ár jyldary QR Ulttyq bankinde, «Samuryq-Qazyna» AQ men «Azamattarǵa arnalǵan úkimet» memlekettik korporatsiiasynda eńbek etken.
2018 jyly Almaty qalasy ákimi apparatynyń bas inspektory qyzmetin atqardy. Sol jyly shildeden 2019 jyldyń naýryzyna deiin Jetisý aýdany ákiminiń apparatynyń basshysy boldy. 2019 jyly Prezidenttik jastar kadr rezervine engen.
