Jumys babynda qaza tapqan áskeri qyzmetkerlerdi jerleýge bólinetin qarjy kólemi belgili boldy, dep habarlaidy Dalanews.kz.
Qorǵanys ministrligi qyzmet barysynda qaza tapqan áskeri qyzmetkerdiń máiitin tasymaldaý men jerleýge 314 560 teńge kóleminde qarajat bóletinin málimdedi. Bul týraly "Ashyq NQA" portalynda jariialanǵan ministrliktiń qaýlysynda kórsetilgen.
Atalǵan soma marqumnyń denesin týǵan jerine jetkizýge, jerleý rásimin uiymdastyrýǵa jáne qulpytas ornatýǵa jumsalady.
"Áskeri boryshyn óteý kezinde qaza tapqan nemese qyzmettik mindetterin oryndaý barysynda alǵan jaraqatynan, kontýziiadan nemese aýyr syrqattan qaitys bolǵan áskeri qyzmetshilerdiń máiitin tasymaldaý, ony jerleý, qulpytas jasaý jáne ornatý shyǵyndary ailyq eseptik kórsetkishtiń (AEK) 80 eselengen mólsheri retinde belgilensin", – delingen qujatta.
Qujatqa engizilgen ózgerister artyq anyqtamalardy alyp tastaý maqsatynda jasalǵan. Buǵan deiingi redaktsiiada "áskeri jiyndarǵa shaqyrylǵan áskeri mindettiler" degen tirkes bolǵan, jańa qujatta bul sózder alyp tastalǵan.
Áskerdegi ólim-jitim máselesi
Eske salaiyq, buǵan deiin depýtat Nartai Sársenǵaliev Májilis minberinde "qazaq áskerindegi qazirgi adamshoshyrlyq ahýaldy" kótergen edi.
Keiingi kezde áskerdegi qaiǵyly jaǵdailardyń qatary siremei tur. Depýtattyń sózinshe, sońǵy 3 jylda 270 áskeri qyzmetker ajal qushqan.
"Jaýyrdy jaba toqyǵanmen jaranyń jazylmaityny belgili, onyń aiǵaǵy beibit kúnde sarbazdarymyz túrli dene jaraqatyn alyp, keibireýi qaitys bolýda. Bul bir emes, birneshe ret qaitalanǵan jaǵdai. Osynyń saldarynan aiyppul salmaq túgili aiyp taqsańda eshkim baýyr eti balasyn jastar jan tapsyrǵan orta – ásker qataryna jibergisi kelmeidi.
Máselen, sońǵy úsh jylda Qazaqstanda 270 áskeri qyzmetker qaitys bolǵan, al sońǵy tórt jylda áskerde 86 sýitsid tirkelgen, 20 áskeri adam óz-ózine qol salýǵa oqtalǵan. Bul – áskeri prokýratýra málimdegen resmi san", - dedi ol.
Depýtat buǵan deiingi daýly isterdi tizip, dúiim el nazaryn tigip otyrǵan Ulttyq ulan jaýyngeri Erbaian Muhtardyń jaǵdaiyna da toqtaldy.
"2023 jylǵy tamyzda áskeri bólimshelerdiń birinde komandir áskerge jańadan kelgen sarbazdy oryndyqpen uryp, soqqyǵa jyqqan. Arty nemen bitti deisiz ǵoi, is taraptardyń bitimge kelýimen jabylyp qalǵan. 2024 jyldyń maýsym aiynda Jambyl oblysynyń bir áskeri bólimshesinde áskerge kelgenine 1-aq ai bolǵan sarbaz es-tússiz jansaqtaý bólimine túsken.
Al taiaýda oryn alǵan jaǵdai búkil otandasymyzdyń ashý-yzasyn týǵyzdy. Ulttyq ulannyń jaýyngeri Erbaian Muhtar basynan alǵan jaraqattan bes ai boiy es-tússiz jatyr. Jaýaptylar "Erbaian dárethanaǵa qulap, jaraqattandy" deidi. Buǵan kim senedi? Jaraqattyń saldarynan sarbazdyń basynyń jartysyn alyp tastaýǵa týra kelgen. Endi oǵan turaqty kútim qajet. Qazir ata-anasy Erbaiandy shetelge emge áketýge qam jasaýda", - dedi ol.
Sondai-aq, jýyrda Aqtaýdaǵy garnizonynda kóz jumǵan sarbaz Marat Barqulovqa qatysty oqiǵany aitty.
"Ony ofitser atyp tastaǵan. Bul qasaqana jasalǵan áreket, joq pa? Atalǵan suraqtyń jaýabyn tergeý oryndary ádil zerttep, nátijesin qoǵamǵa ashyq túrde jetkizýi kerek.
Memleket basshysy biylǵy Joldaýynda «Ár ata-ana áskerge ketken balasyn memleketke senip tapsyrady. Sondyqtan sarbazdardyń densaýlyǵy men qaýipsizdigine, eń aldymen, armiia basshylyǵy jáne quqyq qorǵaý mekemeleriniń basshylary jaýapty», - dep atap ótti. Ókinishke qarai, armiiadaǵy jaǵdai buǵan múldem kereǵar bolyp tur", - dedi depýtat.
