Búgin «Dostyq úiinde» oblys ákimi Nurlybek Nálibaevtyń qatysýymen Respýblikalyq referendým aiasynda «Halyqtyq Konstitýtsiia – qýatty memleket» taqyrybynda sarapshylar kezdesýi ótti, dep habarlaidy Dalanews.kz.
Oǵan máslihat depýtattary, quqyq qorǵaý organdarynyń, basqarmalar men aýmaqtyq departamentterdiń basshylary, biznes qaýymdastyǵynyń ókilderi, joǵary oqý oryndarynyń ǵalym-ustazdary, saiasi partiia jetekshileri, úkimettik emes uiymdar, Assambleia músheleri, jastar, buqaralyq aqparat quraldarynyń ókilderi qatysty.
Aimaq basshysy konstitýtsiialyq reformanyń mańyzdylyǵyna toqtalyp, jalpyhalyqtyq referendýmnyń el bolashaǵy úshin airyqsha mánge ie ekenin atap ótti.
«Konstitýtsiialyq reforma jónindegi jalpyhalyqtyq talqylaýlar jarty jylǵa jýyq ýaqyt ártúrli alańdarda ótti. Bul – qoǵamnyń saiasi belsendiligi men azamattyq jaýapkershiliginiń aiqyn kórinisi. El taǵdyryna qatysty mańyzdy sheshimderdi halyqtyń tikelei daýys berýine usyný – demokratiianyń shynaiy ári myzǵymas qaǵidaty.
Jańa Konstitýtsiia jobasynda memleketimizdiń irgeli negizderi, basty qundylyqtary men dúnietanymdyq ustanymdary júielenip, zamanaýi talaptarǵa sai jańǵyrtyldy.
Jalpyhalyqtyq referendým Táýelsiz Qazaqstannyń aldaǵy damý kezeńin aiqyndap, el tarihynda jańa belestiń bastalýyna negiz bolady dep senemiz.
Prezidentimizdiń bastamasymen elimizde sońǵy jyldary qolǵa alynǵan saiasi reformalardy júzege asyrýda Syr óńiri bereke-birliktiń, tatý tirliktiń úlgisin kórsetip keledi.
Ultymyzdyń tarihyna altyn árippen jazylatyn aldaǵy mańyzdy saiasi kezeńde Syr jurtshylyǵy elimizdiń shynaiy patrioty retinde azamattyq ustanymdaryn bildirip, jańa Konstitýtsiianyń jobasyn qoldaidy dep senemiz. Barshańyzdy osy iske joǵary jaýapkershilikpen belsendi atsalysýǵa shaqyramyn!», – dedi Nurlybek Nálibaev.
Jiynda oblys prokýrory Rizabek Kárimuly, QR Senatorlar keńesiniń múshesi Murat Baqtiiaruly, Qorqyt ata atyndaǵy Qyzylorda ýniversitetiniń basqarma tóraǵasy-rektory, tarih ǵylymdarynyń kandidaty Naýryzbai Seiitqaliuly, bilim salasynyń ardageri Raikúl Mansurqyzy, Qazaqstannyń Azamattyq Aliansy qaýymdastyǵy oblystyq filialynyń tóraiymy, oblystyq qoǵamdyq keńes múshesi Anar Jarylqasynqyzy, «Anaǵa taǵzym» ortalyǵynyń direktory Altynai Bekmaǵambetqyzy , «Amanat» partiiasy janyndaǵy «Jastar rýhy» jastar qanaty oblystyq filialynyń tóraǵasy Ásethan Qaziuly pikir aitty.
Sondai-aq, jiyn sońynda pikir bildirgen oblys turǵyny, mektep ustazy Mahambetáli Ábdihamituly Konstitýtsiianyń jańa jobasyndaǵy «Gimn» sózin «Ánuran» dep aýystyrý týraly usynysy Konstitýtsiialyq komissiia otyrysynda qaralyp, oń sheshimin tapqanyna rizashylyǵyn bildirdi.
«Elimizdiń ár azamaty óz úniniń estilgenin qalaidy. Men qarapaiym aýyl turǵyny retinde tarihi kezeńde óz usynysymdy bildirdim jáne onyń qabyldanǵanyna qýanyshtymyn», – dedi Shieli aýdanynyń turǵyny Mahambetáli Ábdihamituly.
