بۇگىن «دوستىق ۇيىندە» وبلىس اكىمى نۇرلىبەك نالىبايەۆتىڭ قاتىسۋىمەن رەسپۋبليكالىق رەفەرەندۋم اياسىندا «حالىقتىق كونستيتۋسيا – قۋاتتى مەملەكەت» تاقىرىبىندا ساراپشىلار كەزدەسۋى ءوتتى، دەپ حابارلايدى Dalanews.kz.
وعان ءماسليحات دەپۋتاتتارى، قۇقىق قورعاۋ ورگاندارىنىڭ، باسقارمالار مەن اۋماقتىق دەپارتامەنتتەردىڭ باسشىلارى، بيزنەس قاۋىمداستىعىنىڭ وكىلدەرى، جوعارى وقۋ ورىندارىنىڭ عالىم-ۇستازدارى، ساياسي پارتيا جەتەكشىلەرى، ۇكىمەتتىك ەمەس ۇيىمدار، اسسامبلەيا مۇشەلەرى، جاستار، بۇقارالىق اقپارات قۇرالدارىنىڭ وكىلدەرى قاتىستى.
ايماق باسشىسى كونستيتۋسيالىق رەفورمانىڭ ماڭىزدىلىعىنا توقتالىپ، جالپىحالىقتىق رەفەرەندۋمنىڭ ەل بولاشاعى ءۇشىن ايرىقشا مانگە يە ەكەنىن اتاپ ءوتتى.
«كونستيتۋسيالىق رەفورما جونىندەگى جالپىحالىقتىق تالقىلاۋلار جارتى جىلعا جۋىق ۋاقىت ءارتۇرلى الاڭداردا ءوتتى. بۇل – قوعامنىڭ ساياسي بەلسەندىلىگى مەن ازاماتتىق جاۋاپكەرشىلىگىنىڭ ايقىن كورىنىسى. ەل تاعدىرىنا قاتىستى ماڭىزدى شەشىمدەردى حالىقتىڭ تىكەلەي داۋىس بەرۋىنە ۇسىنۋ – دەموكراتيانىڭ شىنايى ءارى مىزعىماس قاعيداتى.
جاڭا كونستيتۋسيا جوباسىندا مەملەكەتىمىزدىڭ ىرگەلى نەگىزدەرى، باستى قۇندىلىقتارى مەن دۇنيەتانىمدىق ۇستانىمدارى جۇيەلەنىپ، زاماناۋي تالاپتارعا ساي جاڭعىرتىلدى.
جالپىحالىقتىق رەفەرەندۋم تاۋەلسىز قازاقستاننىڭ الداعى دامۋ كەزەڭىن ايقىنداپ، ەل تاريحىندا جاڭا بەلەستىڭ باستالۋىنا نەگىز بولادى دەپ سەنەمىز.
پرەزيدەنتىمىزدىڭ باستاماسىمەن ەلىمىزدە سوڭعى جىلدارى قولعا الىنعان ساياسي رەفورمالاردى جۇزەگە اسىرۋدا سىر ءوڭىرى بەرەكە-بىرلىكتىڭ، تاتۋ تىرلىكتىڭ ۇلگىسىن كورسەتىپ كەلەدى.
ۇلتىمىزدىڭ تاريحىنا التىن ارىپپەن جازىلاتىن الداعى ماڭىزدى ساياسي كەزەڭدە سىر جۇرتشىلىعى ەلىمىزدىڭ شىنايى پاتريوتى رەتىندە ازاماتتىق ۇستانىمدارىن ءبىلدىرىپ، جاڭا كونستيتۋسيانىڭ جوباسىن قولدايدى دەپ سەنەمىز. بارشاڭىزدى وسى ىسكە جوعارى جاۋاپكەرشىلىكپەن بەلسەندى اتسالىسۋعا شاقىرامىن!»، – دەدى نۇرلىبەك نالىبايەۆ.
جيىندا وبلىس پروكۋرورى ريزابەك كارىم ۇلى، ق ر سەناتورلار كەڭەسىنىڭ مۇشەسى مۇرات باقتيار ۇلى، قورقىت اتا اتىنداعى قىزىلوردا ۋنيۆەرسيتەتىنىڭ باسقارما توراعاسى-رەكتورى، تاريح عىلىمدارىنىڭ كانديداتى ناۋرىزباي سەيىتقالي ۇلى، ءبىلىم سالاسىنىڭ ارداگەرى رايكۇل مانسۇر قىزى، قازاقستاننىڭ ازاماتتىق اليانسى قاۋىمداستىعى وبلىستىق فيليالىنىڭ ءتورايىمى، وبلىستىق قوعامدىق كەڭەس مۇشەسى انار جارىلقاسىن قىزى، «اناعا تاعزىم» ورتالىعىنىڭ ديرەكتورى التىناي بەكماعامبەت قىزى ، «امانات» پارتياسى جانىنداعى «جاستار رۋحى» جاستار قاناتى وبلىستىق فيليالىنىڭ ءتوراعاسى اسەتحان قازي ۇلى پىكىر ايتتى.
سونداي-اق، جيىن سوڭىندا پىكىر بىلدىرگەن وبلىس تۇرعىنى، مەكتەپ ۇستازى ماحامبەتالى ءابدىحاميت ۇلى كونستيتۋسيانىڭ جاڭا جوباسىنداعى «گيمن» ءسوزىن «ءانۇران» دەپ اۋىستىرۋ تۋرالى ۇسىنىسى كونستيتۋسيالىق كوميسسيا وتىرىسىندا قارالىپ، وڭ شەشىمىن تاپقانىنا ريزاشىلىعىن ءبىلدىردى.
«ەلىمىزدىڭ ءار ازاماتى ءوز ءۇنىنىڭ ەستىلگەنىن قالايدى. مەن قاراپايىم اۋىل تۇرعىنى رەتىندە تاريحي كەزەڭدە ءوز ۇسىنىسىمدى ءبىلدىردىم جانە ونىڭ قابىلدانعانىنا قۋانىشتىمىن»، – دەدى شيەلى اۋدانىنىڭ تۇرعىنى ماحامبەتالى ءابدىحاميت ۇلى.
