Búgin Nartai Bekejanov atyndaǵy qazaq akademiialyq mýzykalyq drama teatrynda 7 mamyr - Otan qorǵaýshy kúnine jáne 9 Mamyr - Uly Jeńistiń 80 jyldyǵyna arnalǵan «Uly Jeńis - erlikke taǵzym, urpaqqa úlgi» atty merekelik shara ótti,- dep habarlaidy Dalanews.kz
Sharada Qyzylorda oblysynyń ákimi Nurlybek Nálibaev maidangerler men sarbazdardy Otan qorǵaýshy kúnimen quttyqtady.
"Prezidentimiz, Qazaqstan Qarýly Kúshteriniń Joǵarǵy Bas Qolbasshysy Qasym-Jomart Kemeluly "Memleket týǵan jeri úshin aianbai eńbek etip, áskeri qyzmetke búkil ǵumyryn arnaǵan otansúigish perzentterin jan-jaqty qoldaýǵa airyqsha mán beredi. Bizdiń mindetimiz – jańa geosaiasi ahýalǵa sai elimizdiń qorǵanys qabiletin odan ári nyǵaita túsý", – dep atap ótti.
Elimizdiń aýmaqtyq tutastyǵyn saqtaýda, ulttyq múddesin qorǵaýda antyna adal, sertine berik aibyndy áskerimiz ózine júktelgen qasterli mindetin múltiksiz oryndaýda.
Quqyq qorǵaý organdary qoǵamda zań men tártipti, arnaýly qyzmetter ulttyq qaýipsizdikti qamtamasyz etýde. Qutqarýshylar halqymyzdyń amandyǵy úshin aianbai ter tógýde. Elimizdiń armiiasy zamanaýi qarýmen, ozyq tehnikamen qamtamasyz etilgen. Memleket tarapynan áskerilerdi, quqyq qorǵaý, azamattyq qorǵanys organdarynyń qyzmetkerlerin áleýmettik turǵydan jan-jaqty qoldaýǵa basa kóńil bólingen. Jalpyulttyq birlik pen saiasi turaqtylyqtyń nátijesinde el syrty jaýdan, ishi daýdan aman bolyp, memleketimiz ornyqty damyp keledi.
"Táýelsizdigimiz ben baitaq jerimizdi, tynyshtyǵymyz ben beibitshiligimizdi qas qaqpai kúzetip, halqymyzǵa qorǵan bolǵan ulttyq áskerimizdiń mártebesi asqaqtai bersin! Elimiz eńseli, Táýelsizdigimiz tuǵyrly bolǵai!" - dedi N.Nálibaev.
Rásimde tyl jáne sala ardagerleri, mamandary "Uly Otan soǵysyndaǵy Jeńiske 80 jyl" merekelik medalimen jáne oblys ákiminiń Alǵys hatymen marapattaldy.
Aita ketý kerek, mereke qarsańynda óńirimizdegi Uly Otan soǵysynyń 2 ardageri, 1700 tyl eńbekkeri Prezident Jarlyǵymen «Uly Otan soǵysyndaǵy Jeńiske 80 jyl» merekelik medalimen marapattaldy.
Sonymen qatar, 5 mamyr kúni Aqordada Memleket basshysy Qasym-Jomart Kemeluly memlekettik nagradalar, joǵary áskeri ataqtar, synyptyq shender tapsyrý rásiminde jerlesimiz Rahymov Arman Tastemirulyna sybailas jemqorlyqqa qarsy qyzmetiniń general-maiory arnaýly ataǵyn berdi.
