Aqmola oblysyndaǵy Bestóbe kenishinde taǵy bir qaiǵyly jaǵdai boldy. 19 mamyr kúni “Qazaqaltynǵa” qarasty “Tsentralnaia” shahtasynda eki adam qaza tapty, dep habarlaidy dalanews.kz.
Aldyn ala aqparat boiynsha, er adamdar jumys istemeitin shahta bóligine kirgen kezde ústine taý jynysy opyrylyp túsken. Oqiǵa shahtanyń 610-gorizontynda bolǵan. Qutqarýshylar dereý jetkenimen, eki adamnyń da ómirin saqtap qalý múmkin bolmady.
Aqmola oblysynyń politsiia departamenti atalǵan oqiǵaǵa bailanysty qylmystyq is qozǵalǵanyn málimdedi. Qazir tergeý júrip jatyr.
