Qyzylorda oblysynda Memleket basshysynyń tapsyrmasymen elge qaitarylǵan aktivterdiń qarajaty esebinen jańa meditsinalyq nysandardyń qurylysy bastaý aldy. Áńgime – az qarjy emes, 7 mlrd teńge týraly. Bul qarajat Aral, Qazaly, Shieli jáne Jańaqorǵan aýdandaryndaǵy ortalyq aýrýhanalar janynan jańa ǵimarattar turǵyzýǵa jumsalady.
Qarapaiym halyq úshin eń bastysy – aýyldyq jerde qoljetimsiz bolyp kelgen insýlt ortalyqtary men rentgenhirýrgiia bólimsheleri endi ózderiniń aýdanynan tabylmaq. Zamanaýi apparattar – magnittik-rezonanstyq tomografiia, kompiýterlik tomografiia, angiografiialyq qondyrǵylar – kez kelgen megapolistiń emes, shalǵai aýyl turǵyndarynyń igiligine ainalǵaly tur.
Mundai jobalardyń mańyzy – tek ǵimarattyń salynýynda emes. Aýyl men qala arasyndaǵy meditsinalyq alshaqtyqty qysqartý, der kezinde diagnoz qoiý arqyly myńdaǵan adamnyń ómirin saqtap qalý múmkindiginde. Statistikaǵa súiensek, 300 myńnan astam turǵyn aldaǵy ýaqytta mamandandyrylǵan kómekke qol jetkizedi. Bul – «dárigerge jetý úshin qalaǵa barý» degen túsiniktiń birtindep joiyla bastaǵanynyń belgisi. Otandyq meditsinadaǵy teńsizdikti azaitýǵa baǵyttalǵan naqty qadam.
Jobanyń taǵy bir ereksheligi – qarjynyń qaidan kelip jatqanynda. Zańsyz shetel asqan aktivterdi qaitaryp, ony áleýmettik nysandarǵa jumsaý – ádilettiń ornaýynyń bir kórinisi. Buryn qara halyqqa jetpei ketken bailyq endi halyqtyń ózine qyzmet ete bastady. Bul qoǵamǵa berilgen úlken signal: ádildiktiń salmaǵy bar, zańsyz ketken dúnie túbi elge qaitady. Árbir salynǵan aýrýhana – ádildiktiń sáýlesi, senimniń belgisi.
Jospar boiynsha nysandar biyldyń ózinde paidalanýǵa berilmek. Bul – tek meditsinalyq infraqurylym emes, aýyldaǵy ómir sapasynyń artýy, dárigerlerdiń kásibi deńgeiin jańa quraldarmen shyńdaý, jas mamandardyń aýylda turaqtap qalýyna yqpal etý. Ult densaýlyǵynyń irgesi osylai qalanady. Halyqqa jasalǵan ár igilik – memlekettiń turaqtylyǵynyń kepili. Qarapaiym aýyl turǵynyna qoljetimdi bolǵan meditsinalyq kómek – qoǵamdaǵy eń úlken áleýmettik ádilettiliktiń ólshemi.
