Qyzylorda oblysynyń Jańaqorǵan aýdanynda mekteptiń bas esepshisi bolǵan Abzal Seidekovke qatysty qylmystyq is boiynsha sot úkimi shyqty. Ol qyzmet babyn paidalanyp, memlekettik mekeme qarjysyn qaltaǵa basqan. Bul týraly Qyzylorda oblysy boiynsha Ekonomikalyq tergep-tekserý departamenti málimdedi,- dep habarlaidy Dalanews.kz
– Tergeý barysynda anyqtalǵandai, A.Seidekov 2023 jyldyń 1 qańtarynan 2024 jyldyń 31 jeltoqsanyna deiingi aralyqta ózine senip tapsyrylǵan laýazymdyq mindetterin teris paidalanyp, mektep qyzmetkerleriniń ailyq jalaqysyn esepteý kezinde únemdelgen qarajatty óz shotyna zańsyz aýdaryp otyrǵan. Ol jalpy somasy 36 million teńge kóleminde qarajatty jymqyryp, ony "Pin Up" býkmekerlik qosymshasy arqyly qumar oiyndaryna jumsaǵan, – dep habarlaidy Qyzylorda oblysy boiynsha ekonomikalyq tergep-tekserý departamenti.
Mekteptiń burynǵy bas esepshisi Qylmystyq kodekstiń 189-babyniń 4-bóligi 2-tarmaǵy (senip tapsyrylǵan bóten múlikti iemdenip alý nemese ysyrap etý, asa iri mólsherde) boiynsha kináli dep tanylyp, sot úkimimen 7 jylǵa bas bostandyǵynan aiyryldy.
– Sonymen qatar 7 jyl merzimge esepshilik qyzmetpen ainalysý quqyǵynan aiyryldy. Sottalýshy jazasyn qylmystyq atqarý júiesiniń qaýipsizdigi ortasha mekemesinde óteidi, - delingen departament habarlamasynda.
