Qyzylorda oblysy ákimi Nurlybek Nálibaev densaýlyq saqtaý salasynyń ardageri Bisenkúl Ótegenqyzy Káribaevany 70 jas mereitoiymen quttyqtady. Basqosýǵa ziialy qaýym ókilderi, densaýlyq saqtaý salasynyń ardagerleri, qyzmetkerleri qatysty.
Aimaq basshysy týǵan jer aldyndaǵy azamattyq paryzyn adal atqarǵan el aǵalary men aq jaýlyqty analarymyzdyń eren eńbegin qurmetteý qasietti paryz ekenin aityp, mereitoi iesine quttyqtaýyn jetkizdi.
«Óńirimizde meditsina salasynyń órkendeýine, halyqtyń densaýlyǵyn saqtaýǵa erekshe eńbek sińirgen ardaqty aǵa-apalarymyz az emes. Sol kisilerdiń izin basyp, el igiligi úshin atqarǵan abyroily qyzmetterin jalǵaǵan dárigerlerimizdiń qatarynda búginde mereili 70 jasqa tolǵan Bisenkúl Ótegenqyzyn erekshe atap ótýimiz kerek.
Ol 1955 jyly Qyzylorda qalasynda dúniege kelgen. Almaty memlekettik meditsina institýtynyń «Emdeý isi» fakýltetinde bilim alǵan.
Eńbek jolyn 1979 jyly №2 Qyzylorda qalalyq emhanasynda dáriger bolyp bastap, bas dárigerdiń orynbasary, bas dáriger qyzmetterin atqardy. №5 qalalyq emhanada, immýntapshylyǵy sindromymen kúres ortalyǵynda bas dáriger bolǵan kezinde bilikti maman ári uiymdastyrýshy retinde halyqtyń rizashylyǵyna bólendi.
Qurmetti zeinet demalysyna shyqqannan keiin meditsina ortalyǵynda qyzmetin jalǵastyryp, jas mamandarǵa salanyń qyr-syryn úiretýmen ainalysyp keledi.
Bisenkúl Ótegenqyzynyń eńbegi baǵalanyp, «Densaýlyq saqtaý isiniń úzdigi» tósbelgisimen, «Eren eńbegi úshin» medalimen marapattaldy.
Sizdi Syr jurtshylyǵynyń atynan mereitoiyńyzben shyn júrekten quttyqtaimyz!», – dedi N.Nálibaev.
Jiynda oblys ákimi mereitoi iesine Qyzylorda oblysynyń Qurmet gramotasyn tabystap, dástúrge sai qurmet kórsetti. Oblystyq ardagerler keńesiniń tóraǵasy Serik Dúisenbaev, Qyzylorda oblysynyń qurmetti azamaty Abdýlla Shúlenbaev, Densaýlyq saqtaý isiniń úzdigi Qarakóz Balabekova sóz sóilep, izgi tilekterin bildirdi.
