قىزىلوردا وبلىسى اكىمى نۇرلىبەك نالىبايەۆ دەنساۋلىق ساقتاۋ سالاسىنىڭ ارداگەرى بيسەنكۇل وتەگەن قىزى كارىبايەۆانى 70 جاس مەرەيتويىمەن قۇتتىقتادى. باسقوسۋعا زيالى قاۋىم وكىلدەرى، دەنساۋلىق ساقتاۋ سالاسىنىڭ ارداگەرلەرى، قىزمەتكەرلەرى قاتىستى.
ايماق باسشىسى تۋعان جەر الدىنداعى ازاماتتىق پارىزىن ادال اتقارعان ەل اعالارى مەن اق جاۋلىقتى انالارىمىزدىڭ ەرەن ەڭبەگىن قۇرمەتتەۋ قاسيەتتى پارىز ەكەنىن ايتىپ، مەرەيتوي يەسىنە قۇتتىقتاۋىن جەتكىزدى.
«وڭىرىمىزدە مەديسينا سالاسىنىڭ وركەندەۋىنە، حالىقتىڭ دەنساۋلىعىن ساقتاۋعا ەرەكشە ەڭبەك سىڭىرگەن ارداقتى اعا-اپالارىمىز از ەمەس. سول كىسىلەردىڭ ءىزىن باسىپ، ەل يگىلىگى ءۇشىن اتقارعان ابىرويلى قىزمەتتەرىن جالعاعان دارىگەرلەرىمىزدىڭ قاتارىندا بۇگىندە مەرەيلى 70 جاسقا تولعان بيسەنكۇل وتەگەنقىزىن ەرەكشە اتاپ ءوتۋىمىز كەرەك.
ول 1955 جىلى قىزىلوردا قالاسىندا دۇنيەگە كەلگەن. الماتى مەملەكەتتىك مەديسينا ينستيتۋتىنىڭ «ەمدەۋ ءىسى» فاكۋلتەتىندە ءبىلىم العان.
ەڭبەك جولىن 1979 جىلى №2 قىزىلوردا قالالىق ەمحاناسىندا دارىگەر بولىپ باستاپ، باس دارىگەردىڭ ورىنباسارى، باس دارىگەر قىزمەتتەرىن اتقاردى. №5 قالالىق ەمحانادا، يممۋنتاپشىلىعى سيندرومىمەن كۇرەس ورتالىعىندا باس دارىگەر بولعان كەزىندە بىلىكتى مامان ءارى ۇيىمداستىرۋشى رەتىندە حالىقتىڭ ريزاشىلىعىنا بولەندى.
قۇرمەتتى زەينەت دەمالىسىنا شىققاننان كەيىن مەديسينا ورتالىعىندا قىزمەتىن جالعاستىرىپ، جاس ماماندارعا سالانىڭ قىر-سىرىن ۇيرەتۋمەن اينالىسىپ كەلەدى.
بيسەنكۇل وتەگەن قىزىنىڭ ەڭبەگى باعالانىپ، «دەنساۋلىق ساقتاۋ ءىسىنىڭ ۇزدىگى» توسبەلگىسىمەن، «ەرەن ەڭبەگى ءۇشىن» مەدالىمەن ماراپاتتالدى.
ءسىزدى سىر جۇرتشىلىعىنىڭ اتىنان مەرەيتويىڭىزبەن شىن جۇرەكتەن قۇتتىقتايمىز!»، – دەدى ن.نالىبايەۆ.
جيىندا وبلىس اكىمى مەرەيتوي يەسىنە قىزىلوردا وبلىسىنىڭ قۇرمەت گراموتاسىن تابىستاپ، داستۇرگە ساي قۇرمەت كورسەتتى. وبلىستىق ارداگەرلەر كەڭەسىنىڭ ءتوراعاسى سەرىك دۇيسەنبايەۆ، قىزىلوردا وبلىسىنىڭ قۇرمەتتى ازاماتى ابدۋللا شۇلەنبايەۆ، دەنساۋلىق ساقتاۋ ءىسىنىڭ ۇزدىگى قاراكوز بالابەكوۆا ءسوز سويلەپ، ىزگى تىلەكتەرىن ءبىلدىردى.
