Qyzylorda qalasynda óńirdiń sporttyq jáne mádenı ınfraqurylymynyń mańyzdy nysanyna aınalatyn zamanaýı sport kesheni salynady, – dep habarlaıdy Dalanews.kz

«Memsaraptama» RMK Qyzylorda qalasynda «Qyzylorda Arena» kópfýnksıonaldy sport keshenin salý jobasyna oń qorytyndy berdi. Jańa nysan sporttyq jarystar, mádenı-buqaralyq jáne oıyn-saýyq is-sharalaryn ótkizýge arnalǵan.

Qurylys alańy Sultan Beıbarys pen Ábdýalı Spanov kósheleriniń qıylysynda, Syrdarıa ózeniniń oń jaǵalaýynda, qalanyń shyǵys bóliginde ornalasqan. 2,1177 ga jer ýchaskesi buryn ashyq sport alańdary retinde paıdalanylǵan. Jańadan boı kóteretin nysan qalanyń ortalyq bóligine jaqyn bolýy kelýshilerge óte yńǵaıly bolmaq.

Jobaǵa sáıkes keshenniń aýmaǵy arena ǵımaraty men sharýashylyq aımaǵyn qamtıdy. Jobalaý kezinde barlyq sanıtarlyq jáne órtke qarsy normalar, sondaı-aq kelýshiler men kólik aǵyndaryn uıymdastyrýǵa qoıylatyn talaptar saqtalǵan.

Sý jańa arenada 2074 oryndy ámbebap sport zaly men 462 oryndy trıbýnasy bar baseın bolady. Sondaı-aq, ártúrli sport zaldar, medısınalyq qyzmet kórsetý bólmeleri, qoǵamdyq tamaqtaný obektileri bolady. Ǵımarattyń birinshi qabatynda arnaıy aýdarmashylar men operatorlar otyratyn 150 adamǵa arnalǵan úlken konferens-zal ashý josparlanǵan, bul halyqaralyq deńgeıdegi is-sharalardy ótkizýge múmkindik beredi.