قىزىلوردا قالاسىندا ءوڭىردىڭ سپورتتىق جانە مادەني ينفراقۇرىلىمىنىڭ ماڭىزدى نىسانىنا اينالاتىن زاماناۋي سپورت كەشەنى سالىنادى، – دەپ حابارلايدى Dalanews.kz
«مەمساراپتاما» رمك قىزىلوردا قالاسىندا «قىزىلوردا ارەنا» كوپفۋنكسيونالدى سپورت كەشەنىن سالۋ جوباسىنا وڭ قورىتىندى بەردى. جاڭا نىسان سپورتتىق جارىستار، مادەني-بۇقارالىق جانە ويىن-ساۋىق ءىس-شارالارىن وتكىزۋگە ارنالعان.
قۇرىلىس الاڭى سۇلتان بەيبارىس پەن ءابدۋالي سپانوۆ كوشەلەرىنىڭ قيىلىسىندا، سىرداريا وزەنىنىڭ وڭ جاعالاۋىندا، قالانىڭ شىعىس بولىگىندە ورنالاسقان. 2،1177 گا جەر ۋچاسكەسى بۇرىن اشىق سپورت الاڭدارى رەتىندە پايدالانىلعان. جاڭادان بوي كوتەرەتىن نىسان قالانىڭ ورتالىق بولىگىنە جاقىن بولۋى كەلۋشىلەرگە وتە ىڭعايلى بولماق.
جوباعا سايكەس كەشەننىڭ اۋماعى ارەنا عيماراتى مەن شارۋاشىلىق ايماعىن قامتيدى. جوبالاۋ كەزىندە بارلىق سانيتارلىق جانە ورتكە قارسى نورمالار، سونداي-اق كەلۋشىلەر مەن كولىك اعىندارىن ۇيىمداستىرۋعا قويىلاتىن تالاپتار ساقتالعان.
سۋ جاڭا ارەنادا 2074 ورىندى امبەباپ سپورت زالى مەن 462 ورىندى تريبۋناسى بار باسسەين بولادى. سونداي-اق، ءارتۇرلى سپورت زالدار، مەديسينالىق قىزمەت كورسەتۋ بولمەلەرى، قوعامدىق تاماقتانۋ وبەكتىلەرى بولادى. عيماراتتىڭ ءبىرىنشى قاباتىندا ارنايى اۋدارماشىلار مەن وپەراتورلار وتىراتىن 150 ادامعا ارنالعان ۇلكەن كونفەرەنس-زال اشۋ جوسپارلانعان، بۇل حالىقارالىق دەڭگەيدەگى ءىس-شارالاردى وتكىزۋگە مۇمكىندىك بەرەدى.
