Qyzylorda qalasyndaǵy Óner ortalyǵynda uly oishyl, aqyn, filosof Abai Qunanbaiulynyń 180 jyldyǵyna orai «Abai» operasynyń premerasy ótti. Premerany oblys ákiminiń birinshi orynbasary Daniiar Janalinov, oblys ákiminiń orynbasary Meirambek Shermaǵanbet, máslihat depýtattary, ziialy qaýym ókilderi, qoǵamdyq keńes músheleri, qala turǵyndary tamashalady, dep habarlaidy Dalanews.kz
«Abai» tragediiasy - elimizdiń mádeni ómirin dúr silkindirgen qaitalanbas kesek týyndy. HH ǵasyrdyń 30-40 jyldary qolǵa alynyp, M.Áýezov shyǵarmashylyǵynyń mańyzdy baǵyty bolǵan Abaidai ǵulamanyń taqyryby, qaitalanbas kelbeti oqyrmandarynan buryn sahnada somdalǵan beinesi arqyly halqynyń júreginen oryn aldy. Muhtar Áýezovtiń librettosyna jazylǵan Ahmet Jubanov pen Latif Hamididiń aitýly operasy tek jaqsy men jamannyń aiqasyn beinelegen qoiylym ǵana emes, qazaq halqynyń jan dúniesiniń alýandyǵy men tereńdigin kórsetetin aina, kóshpeli ómirdiń biregei salty men filosofiiasyn pash etetin taǵylymdy týyndy.
Keiipkerdiń oi tereńdigin, sóziniń ótkirligin, til sheberligin, azamat retindegi bedelin filarmoniia ártisteri negizgi qalpyn saqtap, asqan sheberlikpen kórermen qaýymǵa jetkizdi.
Erekshe klassika keshin halyqaralyq jáne respýblikalyq konkýrstardyń laýreaty Rýstam Rysmaǵambetovtiń dirijerlik etýimen oblystyq simfoniia orkestri súiemeldedi. Orkestrdiń kórkemdik jetekshisi jáne bas dirijeri – Qazaqstannyń eńbek sińirgen qairatkeri, professor Músilim Ámze. Tutas sahnalanǵan operaǵa aralas hor ujymy (kórkemdik jetekshisi – A.Qýanysh), «Tomiris» bi ansambli (kórkemdik jetekshisi – halyqaralyq jáne respýblikalyq konkýrstardyń laýreaty M. Toibazarova), «Ai-Aru» zamanaýi bi ansambli (kórkemdik jetekshisi – halyqaralyq jáne respýblikalyq konkýrstardyń laýreaty Z.Styqbaeva), «Ádemi» balalar mýzykalyq teatr-stýdiiasy, (kórkemdik jetekshisi – Q. Boranbaev) jáne filarmoniia solisteri qatysyp, kórermenge mańyzy tereń, filosofiiaǵa toly mádeni demalys syilady.
Operanyń qoiýshy rejisseri – Mádeniet salasynyń úzdigi, «Eren eńbegi úshin» medaliniń iegeri Áziza Izdiqulova.
Abaidyń jeke ómiri, shyǵarmashylyǵy men ony tulǵa retinde aishyqtaýǵa arnalǵan bul týyndy ulttyq rýhty oiatatyn, qoǵamdy birlikke bastaityn zor qozǵaýshy kúshke ie. Abai shyǵarmashylyǵyn, onyń ǵumyrnamalyq, mádeni-rýhani muralaryn san-alýan úlgide nasihattaý qazirgi qazaq rýhaniiaty úshin asa qajet.
