Qyzylordanyń sol jaǵalaýynda 11 myń kórermenge arnalǵan jańa stadionnyń ashylýy ótti. Saltanatty shara aiasynda fýtboldan el Kýbogynyń finaldyq matchy uiymdastyryldy, dep habarlaidy Dalanews.kz.
Sharaǵa Týrizm jáne sport ministri Erbol Myrzabosynov, Qazaqstan fýtbol federatsiiasynyń prezidenti Marat Omarov arnaiy keldi. Sondai-aq, qoǵam qairatkerleri men myńdaǵan fýtbol jankúieri jinaldy.
Aimaq basshysy Nurlybek Nálibaev jinalǵan jurtshylyqty jańa nysannyń ashylýymen quttyqtap, komandalarǵa sáttilik tiledi.
“Búgin - Qazaqstannyń sport tarihyndaǵy aitýly kún. Prezidentimiz Qasym-Jomart Kemelulynyń aimaqtarda sport infraqurylymyn damytý, onyń ishinde stadiondar men sport keshenderin salý týraly tapsyrmasyna sáikes Qyzylorda qalasynda jańa stadion boi kóterdi. Jańa stadionymyzdyń ashylýy fýtboldan Qazaqstan kýbogynyń finaldyq oiynymen tuspa-tus keldi. Jankúierler asyǵa kútetin sport merekesi otandyq fýtbol tarihynda alǵash ret Qyzylorda qalasynda ótýde. Bul - syrboiylyqtar úshin úlken mártebe, zor maqtanysh! Barshańyzdy jańa stadionnyń ashylýymen shyn júrekten quttyqtaimyn! Qalamyzda jańa nysannyń salynýyna erekshe qoldaý bildirgen Memleket basshymyzǵa, Úkimetke barsha Syr jurtshylyǵy atynan shynaiy alǵysymyzdy bildiremiz. Finaldyq oiyndy ótkizýge bastamashy bolyp, uiymdastyrǵan Qazaqstan fýtbol federatsiiasyna zor rizashylyǵymyzdy jetkizemiz. Búgingi oiynǵa joldama alǵan komandalarǵa sáttilik tileimin! Qazaqstan fýtbolynyń dańqy arta bersin!” – dedi Nurlybek Mashbekuly.
Qazaqstan fýtbol federatsiiasynyń prezidenti Marat Omarov jańa stadionnyń ashylýy el fýtboly úshin mańyzdy ekenin atap ótti.
«Qurmetti qyzylordalyqtar jáne fýtbol jankúierleri! Sizderdi jańa stadionnyń ashylýymen shyn júrekten quttyqtaimyn. Bul – elimizdiń fýtbol kartasynan laiyqty oryn alatyn zamanaýi arena. Qazaqstan Kýbogynyń finaly alǵash ret Syr elinde ótip otyr. Osy alańda talai qyzyqty kezdesýler men umytylmas oiyndar ótedi dep senemin. Búgingi final sol tabysty joldyń bastaýy bolsyn!» – dedi Marat Talǵatuly.
Jalpy aýdany 20 myń sharshy metrdi quraityn jańa sporttyq keshen zamanaýi halyqaralyq talaptarǵa sai salynǵan. Munda fýtbol alańy ǵana emes, olimpiadalyq standarttarǵa sáikes keletin boks, kúres, fitnes, sporttyq gimnastika jáne aýyr atletika zaldary ornalasqan. Sonymen qatar, nysanda dúkender men dámhanalar qarastyrylǵan.
Ǵimarattyń birinshi qabatynda sport zaldary, fýtbolshylardyń daiyndyq bólmeleri jáne saýyqtyrý ortalyqtary ornalasqan. Ekinshi qabatta – ákimshilik bólmeler, al úshinshi qabatta – aýqymdy jiyndarǵa arnalǵan májilis zaly bar. Múmkindigi shekteýli sportshylardyń jattyǵýyna da tolyq jaǵdai jasalǵan.
Stadion ÝEFA-nyń 4-sanatyna sáikestendirilgen. Jasyl alań halyqaralyq standarttarǵa sai jasandy tósenishpen jabdyqtalǵan, zamanaýi jaryqtandyrý jáne dybys júieleri ornatylǵan. Bul óz kezeginde halyqaralyq deńgeidegi sporttyq jáne mádeni sharalardy joǵary sapada ótkizýge múmkindik beredi.
