قىزىلوردانىڭ سول جاعالاۋىندا 11 مىڭ كورەرمەنگە ارنالعان جاڭا ستاديوننىڭ اشىلۋى ءوتتى. سالتاناتتى شارا اياسىندا فۋتبولدان ەل كۋبوگىنىڭ فينالدىق ماچى ۇيىمداستىرىلدى، دەپ حابارلايدى Dalanews.kz.
شاراعا تۋريزم جانە سپورت ءمينيسترى ەربول مىرزابوسىنوۆ، قازاقستان فۋتبول فەدەراسياسىنىڭ پرەزيدەنتى مارات وماروۆ ارنايى كەلدى. سونداي-اق، قوعام قايراتكەرلەرى مەن مىڭداعان فۋتبول جانكۇيەرى جينالدى.
ايماق باسشىسى نۇرلىبەك نالىبايەۆ جينالعان جۇرتشىلىقتى جاڭا نىساننىڭ اشىلۋىمەن قۇتتىقتاپ، كوماندالارعا ساتتىلىك تىلەدى.
“بۇگىن - قازاقستاننىڭ سپورت تاريحىنداعى ايتۋلى كۇن. پرەزيدەنتىمىز قاسىم-جومارت كەمەل ۇلىنىڭ ايماقتاردا سپورت ينفراقۇرىلىمىن دامىتۋ، ونىڭ ىشىندە ستاديوندار مەن سپورت كەشەندەرىن سالۋ تۋرالى تاپسىرماسىنا سايكەس قىزىلوردا قالاسىندا جاڭا ستاديون بوي كوتەردى. جاڭا ستاديونىمىزدىڭ اشىلۋى فۋتبولدان قازاقستان كۋبوگىنىڭ فينالدىق ويىنىمەن تۇسپا-تۇس كەلدى. جانكۇيەرلەر اسىعا كۇتەتىن سپورت مەرەكەسى وتاندىق فۋتبول تاريحىندا العاش رەت قىزىلوردا قالاسىندا وتۋدە. بۇل - سىربويىلىقتار ءۇشىن ۇلكەن مارتەبە، زور ماقتانىش! بارشاڭىزدى جاڭا ستاديوننىڭ اشىلۋىمەن شىن جۇرەكتەن قۇتتىقتايمىن! قالامىزدا جاڭا نىساننىڭ سالىنۋىنا ەرەكشە قولداۋ بىلدىرگەن مەملەكەت باسشىمىزعا، ۇكىمەتكە بارشا سىر جۇرتشىلىعى اتىنان شىنايى العىسىمىزدى بىلدىرەمىز. فينالدىق ويىندى وتكىزۋگە باستاماشى بولىپ، ۇيىمداستىرعان قازاقستان فۋتبول فەدەراسياسىنا زور ريزاشىلىعىمىزدى جەتكىزەمىز. بۇگىنگى ويىنعا جولداما العان كوماندالارعا ساتتىلىك تىلەيمىن! قازاقستان فۋتبولىنىڭ داڭقى ارتا بەرسىن!” – دەدى نۇرلىبەك ماشبەك ۇلى.
قازاقستان فۋتبول فەدەراسياسىنىڭ پرەزيدەنتى مارات وماروۆ جاڭا ستاديوننىڭ اشىلۋى ەل فۋتبولى ءۇشىن ماڭىزدى ەكەنىن اتاپ ءوتتى.
«قۇرمەتتى قىزىلوردالىقتار جانە فۋتبول جانكۇيەرلەرى! سىزدەردى جاڭا ستاديوننىڭ اشىلۋىمەن شىن جۇرەكتەن قۇتتىقتايمىن. بۇل – ەلىمىزدىڭ فۋتبول كارتاسىنان لايىقتى ورىن الاتىن زاماناۋي ارەنا. قازاقستان كۋبوگىنىڭ فينالى العاش رەت سىر ەلىندە ءوتىپ وتىر. وسى الاڭدا تالاي قىزىقتى كەزدەسۋلەر مەن ۇمىتىلماس ويىندار وتەدى دەپ سەنەمىن. بۇگىنگى فينال سول تابىستى جولدىڭ باستاۋى بولسىن!» – دەدى مارات تالعات ۇلى.
جالپى اۋدانى 20 مىڭ شارشى مەتردى قۇرايتىن جاڭا سپورتتىق كەشەن زاماناۋي حالىقارالىق تالاپتارعا ساي سالىنعان. مۇندا فۋتبول الاڭى عانا ەمەس، وليمپيادالىق ستاندارتتارعا سايكەس كەلەتىن بوكس، كۇرەس، فيتنەس، سپورتتىق گيمناستيكا جانە اۋىر اتلەتيكا زالدارى ورنالاسقان. سونىمەن قاتار، نىساندا دۇكەندەر مەن ءدامحانالار قاراستىرىلعان.
عيماراتتىڭ ءبىرىنشى قاباتىندا سپورت زالدارى، فۋتبولشىلاردىڭ دايىندىق بولمەلەرى جانە ساۋىقتىرۋ ورتالىقتارى ورنالاسقان. ەكىنشى قاباتتا – اكىمشىلىك بولمەلەر، ال ءۇشىنشى قاباتتا – اۋقىمدى جيىندارعا ارنالعان ءماجىلىس زالى بار. مۇمكىندىگى شەكتەۋلى سپورتشىلاردىڭ جاتتىعۋىنا دا تولىق جاعداي جاسالعان.
ستاديون ۋەفا-نىڭ 4-ساناتىنا سايكەستەندىرىلگەن. جاسىل الاڭ حالىقارالىق ستاندارتتارعا ساي جاساندى توسەنىشپەن جابدىقتالعان، زاماناۋي جارىقتاندىرۋ جانە دىبىس جۇيەلەرى ورناتىلعان. بۇل ءوز كەزەگىندە حالىقارالىق دەڭگەيدەگى سپورتتىق جانە مادەني شارالاردى جوعارى ساپادا وتكىزۋگە مۇمكىندىك بەرەدى.
