Qazaqstandyq grek-rim kúresiniń sheberi Aidos Sultanǵali Horvatiianyń Zagreb qalasynda ótken álem chempionatynyń jeńimpazy atandy. Áleýmettik jelide sportshynyń bul jeńisi týǵan jerinde laiyqty baǵasyn ala almai otyrǵany jóninde jazba tarady. Dalanews.kz máseleniń mán-jaiyna úńildi.
Daýdyń basy
Jýrnalist Aqyrys Seiitqazy áleýmettik jelide mynadai jazba jariialady:
"Keshe chempion atanǵan Aidos Sultanǵali ótkende suhbat berdi maǵan. 2022 jyly Serbiiadaǵy álem chempionatynan qolamen oralady ǵoi. Sóitip týǵan jerine barady. Ol jaqtaǵylar qur diplom men statýetka berip, arqasynan qaǵyp shyǵaryp salypty. Aidos balýandarǵa qoldaýdyń, demeýdiń asa mańyzdy ekenin aityp, biraz nalyǵan. Barlyǵy boksshylardan kem qylmai, 100 myń dollar bersin dep jatyr. Biraq kúreste mundai aqsha qaidan? Ol úshin federatsiianyń tizginin bai-baqýatty, balýandardan eshteńe aiamaityn bireý ustaý kerek", - dedi ol.
Aqyrys Seiitqazy osy tusta óńir ákimdigi de únsiz jatqanyn tilge tiek etken.
"Aitaiyn degenim, Nurlybek Nálibaev 2022 jyldyń sáýirinen beri sol óńirdiń ákimi eken. Aidos sol jyly kúzde álem chempionatyndaǵy ekinshi qolasyn aldy. Endi, mine, chempion atanyp otyr. Ókinishtisi sol, oblys ákimdiginiń resmi instagram paraqshasynda Aidostyń jeńisi týraly bir jazba joq (oblystyq ákimdiktiń resmi saity men resmi instagram paraqshasynda Sultanǵali jaily eshbir málimet joq. Keibir sheneýnikter jeke paraqshalarynda qúttyqtaýy múmkin ekenin joqqa shyǵarmaimyn). Aitpaqshy, qyzylordalyq Móldir Jańbyrbai karateden tuńǵysh álem chempiony bolyp oralǵanda osy Nálibaevtar 300 myń teńge bergen eken. Móldir sol aqshaǵa Qyzylordaǵa baryp-qaitatyn bilep alypty. Osyndai sportshylarǵa zar bolyp otyrǵan aimaqtar bar. Al Qyzylorda qolda baryn baǵalai almai otyr", - dedi ol.
Óńir ákimdigi bul synǵa deidi?
Dalanews.kz osy máselege bailanysty Qyzylorda oblysy ákimdiginiń baspasóz qyzmetine júgindi. Jaýaptylardyń sózinshe, Aidos chempion bolǵan kúni oblys ákimi óziniń paraqshasynda quttyqtaǵan.
Budan bólek Qyzylorda oblysynyń Sport jáne týrizm basqarmasy da jazbaǵa pikir bildirgen.
"Qyzylordalyq Aidos Sultanǵali el namysyn abyroimen qorǵap júrgen talanatty sportshylarymyzdyń biri bolǵandyqtan memleket tarapynan oǵan árdaiym túrli deńgeidegi qoldaýlar kórsetilip keledi. Jalpy Aidos Sultanǵali oblys tarapynan úzdik sportshylarǵa beriletin shákirtaqynyń iegeri ekenin aita keteiik. Munymen qosa, byltyr iaǵni 2024 jyly Parij Olimpiadasyna joldama alǵan sportshymyzǵa oblys ákimi jańa kóliktiń kiltin tabystaǵan bolatyn. Kúni keshe Aidos Sultanǵali qazaq sportynda araǵa 26 jyl salyp, tarihi jetistikke qol jetkizip, el mereiin ústem etti. Osyǵan orai chempion atanǵan sportshymyzǵa óz deńgeiinde qurmet kórsetiledi", - dedi Syr sporty ókilderi.
Dalanews.kz sportshyǵa bul joly naqty qandai qurmet kórsetiletinin anyqtaýǵa tyrysty. Ázirge bul saýalǵa óńir ákimdigi jaýap qatpady.
26 jyl kútken tarihi jeńis
Aidos Sultanǵalidiń bul jetistigi - tarihi jeńis. Óitkeni araǵa 26 jyl salyp Qazaqstan qorjynyna grek-rim kúresinen Álem chempionatynyń altyn júldesi tústi. Ol 60 kelige deiingi salmaq dárejesinde qarsylas shaq keltirmedi.
Finalda Aidos Sultanǵali ózbekstandyq Alisher Ǵanievti 9:0 esebimen aiqyn jeńip, jarysty merziminen buryn aiaqtady.
Aita keteiik, Aidos Sultanǵali buǵan deiin de álem chempionatynda eki ret qola júldeger atanǵan (2018, 2022).
Memleket basshysy grek-rim kúresinen Álem chempiony Aidos Sultanǵalidi quttyqtady.
"Aidos Sultanǵalidi Álem chempionatyndaǵy jarqyn jeńisimen quttyqtaimyn! Ol – grek-rim kúresinen osy ǵasyrdaǵy tuńǵysh jeńimpaz. Balýandarymyzdyń jeńisti joldy jalǵastyra berýine tilektespin!" – dep jazdy Prezident Instagram paraqshasynda.
