قازاقستاندىق گرەك-ريم كۇرەسىنىڭ شەبەرى ايدوس سۇلتانعالي حورۆاتيانىڭ زاگرەب قالاسىندا وتكەن الەم چەمپيوناتىنىڭ جەڭىمپازى اتاندى. الەۋمەتتىك جەلىدە سپورتشىنىڭ بۇل جەڭىسى تۋعان جەرىندە لايىقتى باعاسىن الا الماي وتىرعانى جونىندە جازبا تارادى. Dalanews.kz ماسەلەنىڭ ءمان-جايىنا ءۇڭىلدى.

داۋدىڭ باسى

جۋرناليست اقىرىس سەيىتقازى الەۋمەتتىك جەلىدە مىناداي جازبا جاريالادى:

"كەشە چەمپيون اتانعان ايدوس سۇلتانعالي وتكەندە سۇحبات بەردى ماعان. 2022 جىلى سەربياداعى الەم چەمپيوناتىنان قولامەن ورالادى عوي. ءسويتىپ تۋعان جەرىنە بارادى. ول جاقتاعىلار قۇر ديپلوم مەن ستاتۋەتكا بەرىپ، ارقاسىنان قاعىپ شىعارىپ سالىپتى. ايدوس بالۋاندارعا قولداۋدىڭ، دەمەۋدىڭ اسا ماڭىزدى ەكەنىن ايتىپ، ءبىراز نالىعان. بارلىعى بوكسشىلاردان كەم قىلماي، 100 مىڭ دوللار بەرسىن دەپ جاتىر. ءبىراق كۇرەستە مۇنداي اقشا قايدان؟ ول ءۇشىن فەدەراسيانىڭ تىزگىنىن باي-باقۋاتتى، بالۋانداردان ەشتەڭە ايامايتىن بىرەۋ ۇستاۋ كەرەك"، - دەدى ول.

اقىرىس سەيىتقازى وسى تۇستا ءوڭىر اكىمدىگى دە ءۇنسىز جاتقانىن تىلگە تيەك ەتكەن.

"ايتايىن دەگەنىم، نۇرلىبەك نالىبايەۆ 2022 جىلدىڭ ساۋىرىنەن بەرى سول ءوڭىردىڭ اكىمى ەكەن. ايدوس سول جىلى كۇزدە الەم چەمپيوناتىنداعى ەكىنشى قولاسىن الدى. ەندى، مىنە، چەمپيون اتانىپ وتىر. وكىنىشتىسى سول، وبلىس اكىمدىگىنىڭ رەسمي ينستاگرام پاراقشاسىندا ايدوستىڭ جەڭىسى تۋرالى ءبىر جازبا جوق (وبلىستىق اكىمدىكتىڭ رەسمي سايتى مەن رەسمي ينستاگرام پاراقشاسىندا سۇلتانعالي جايلى ەشبىر مالىمەت جوق. كەيبىر شەنەۋنىكتەر جەكە پاراقشالارىندا ءقۇتتىقتاۋى مۇمكىن ەكەنىن جوققا شىعارمايمىن). ايتپاقشى، قىزىلوردالىق ءمولدىر جاڭبىرباي كاراتەدەن تۇڭعىش الەم چەمپيونى بولىپ ورالعاندا وسى نالىبايەۆتار 300 مىڭ تەڭگە بەرگەن ەكەن. ءمولدىر سول اقشاعا قىزىلورداعا بارىپ-قايتاتىن بيلەپ الىپتى. وسىنداي سپورتشىلارعا زار بولىپ وتىرعان ايماقتار بار. ال قىزىلوردا قولدا بارىن باعالاي الماي وتىر"، - دەدى ول.

ءوڭىر اكىمدىگى بۇل سىنعا دەيدى؟

Dalanews.kz وسى ماسەلەگە بايلانىستى قىزىلوردا وبلىسى اكىمدىگىنىڭ باسپا ءسوز قىزمەتىنە جۇگىندى. جاۋاپتىلاردىڭ سوزىنشە، ايدوس چەمپيون بولعان كۇنى وبلىس اكىمى ءوزىنىڭ پاراقشاسىندا قۇتتىقتاعان.

بۇدان بولەك قىزىلوردا وبلىسىنىڭ سپورت جانە تۋريزم باسقارماسى دا جازباعا پىكىر بىلدىرگەن.

"قىزىلوردالىق ايدوس سۇلتانعالي ەل نامىسىن ابىرويمەن قورعاپ جۇرگەن تالاناتتى سپورتشىلارىمىزدىڭ ءبىرى بولعاندىقتان مەملەكەت تاراپىنان وعان ءاردايىم ءتۇرلى دەڭگەيدەگى قولداۋلار كورسەتىلىپ كەلەدى. جالپى ايدوس سۇلتانعالي وبلىس تاراپىنان ۇزدىك سپورتشىلارعا بەرىلەتىن شاكىرتاقىنىڭ يەگەرى ەكەنىن ايتا كەتەيىك. مۇنىمەن قوسا، بىلتىر ياعني 2024 جىلى پاريج وليمپياداسىنا جولداما العان سپورتشىمىزعا وبلىس اكىمى جاڭا كولىكتىڭ كىلتىن تابىستاعان بولاتىن. كۇنى كەشە ايدوس سۇلتانعالي قازاق سپورتىندا اراعا 26 جىل سالىپ، تاريحي جەتىستىككە قول جەتكىزىپ، ەل مەرەيىن ۇستەم ەتتى. وسىعان وراي چەمپيون اتانعان سپورتشىمىزعا ءوز دەڭگەيىندە قۇرمەت كورسەتىلەدى"، - دەدى سىر سپورتى وكىلدەرى.

Dalanews.kz سپورتشىعا بۇل جولى ناقتى قانداي قۇرمەت كورسەتىلەتىنىن انىقتاۋعا تىرىستى. ازىرگە بۇل ساۋالعا ءوڭىر اكىمدىگى جاۋاپ قاتپادى.

26 جىل كۇتكەن تاريحي جەڭىس

ايدوس ءسۇلتانعاليدىڭ بۇل جەتىستىگى - تاريحي جەڭىس. ويتكەنى اراعا 26 جىل سالىپ قازاقستان قورجىنىنا گرەك-ريم كۇرەسىنەن الەم چەمپيوناتىنىڭ التىن جۇلدەسى ءتۇستى. ول 60 كەلىگە دەيىنگى سالماق دارەجەسىندە قارسىلاس شاق كەلتىرمەدى.

فينالدا ايدوس سۇلتانعالي وزبەكستاندىق اليشەر عانييەۆتى 9:0 ەسەبىمەن ايقىن جەڭىپ، جارىستى مەرزىمىنەن بۇرىن اياقتادى.

ايتا كەتەيىك، ايدوس سۇلتانعالي بۇعان دەيىن دە الەم چەمپيوناتىندا ەكى رەت قولا جۇلدەگەر اتانعان (2018، 2022).

مەملەكەت باسشىسى گرەك-ريم كۇرەسىنەن الەم چەمپيونى ايدوس ءسۇلتانعاليدى قۇتتىقتادى.