Qyzylorda oblysynyń ákimi Nurlybek Nálibaevtyń qatysýymen Jańaqorǵan aýdanynda «Rýhaniiat ortalyǵynyń» saltanatty ashylý rásimi ótti, dep habarlaidy Dalanews.kz.
Merekelik is-sharaǵa Parlament Senaty men Májilisiniń depýtattary Naýryzbai Baiqadamov, Rýslan Rústemov, Murat Ábenov, Marhabat Jaiymbetov, Murat Ergeshbaev qatysty.
Aimaq basshysy jurtshylyqty jańa nysannyń ashylýymen quttyqtap, óńirdiń mádeniet salasynda atqarylǵan jumystarǵa, igi bastamalarǵa toqtaldy.
«Prezidentimiz Qasym-Jomart Kemeluly «Elimizdiń rýhani damýy ulttyq rýhqa tikelei bailanysty. Sol sebepti azamattarymyzdyń rýhy árqashan biik bolýy úshin mádenietimizge, rýhaniiatymyzǵa basa mán berýimiz qajet» - degen bolatyn.
Byltyr Qyzylorda oblysynda «Rýhaniiat jyly» jariialandy. «Anaǵa taǵzym», «Otbasy ortalyǵy», 1000 oryndyq «Óner» ortalyǵy paidalanýǵa berilip, jańadan simfoniia orkestri, inkliýzivti teatr, jastar teatry, zamanaýi bi, hor ujymdary jasaqtaldy. Syr mádenietiniń negizgi brendi – jyraýlyq dástúr ókilderiniń «Jyraýlar úii» ashyldy. «Samuryq qazyna trast» qorymen birge "Ústel tennisi ortalyǵyn", «QazMunaiGaz» kompaniiasynyń demeýshiligimen zamanaýi úlgidegi "Oqýshylar saraiyn" el igiligine tabystadyq. Búginde oblystyq tarihi-ólketaný mýzeii, «Shyǵarmashylyq akademiiasy», "Ortalyq stadion" salynýda. Jańa nysandar biyl mamyr aiynda iske qosylady.
"Rýhaniiat ortalyǵy – birliktiń ordasy» rýhani qazynamyzdy tolyqtyratyn, jurtshylyqqa qýanysh syilaityn orynǵa ainalsyn. Ulttyq qundylyqtarymyz ulyqtalyp, Táýelsiz elimizdiń abyroiy asqaq bolǵai! El irgesi bekem, qýanysh qutty bolsyn!»,- dedi N.Nálibaev.
Jiynda Parlament Senatynyń depýtaty Naýryzbai Baiqadamov, «Aiǵaq» teleradiokompaniiasynyń bas direktory, Túrkistan oblystyq máslihatynyń depýtaty, Qazaqstannyń Qurmetti jýrnalisi Dýlatbek Ábish jinalǵan qaýymdy quttyqtady. Qoǵam qairatkeri, Nájmadin Musabaev aq batasyn berip, aýdannyń órkendeýine úles qosqan ardagerler men merdiger mekeme qyzmetkerleri marapattaldy.
Aita keteiik, biyl - Qyzylorda tarihyndaǵy mańyzdy jyl. Osydan bir ǵasyr buryn memleket astanasyn Orynbordan Aqmeshitke kóshirý týraly sheshim shyǵyp, Keńesterdiń Búkilqazaqstandyq besinshi sezinde «Kirgiz Avtonomiialy Sotsialistik Keńes Respýblikasy» ataýy «Qazaq avtonomiialy Sotsialistik Keńes Respýblikasy» dep ózgertilgen. Ultymyzdyń tarihi «Qazaq» ataýy qaitarylyp, respýblika astanasy Aqmeshit qalasyn Qyzylorda dep ataý týraly qaýly qabyldanǵan. Elimizdiń alǵashqy Úkimet basshylyǵy, basqarý institýttary osy jerde qalyptasyp, nyǵaidy. Alǵashqy óner, bilim mekemeleri ashylyp, ásem ǵimarattar boi kóterdi.
Biyl ult teatrynyń irgetasy qalanǵan Qyzylordadaǵy Nartai Bekejanov atyndaǵy qazaq akademiialyq mýzykalyq drama teatrynyń qurylǵanyna 70 jyl tolady. Kásibi óner ujymy osy jyldary
300-den astam qoiylymdy sahnalaǵan. Respýblikalyq, halyqaralyq festivalderge qatysyp, júldeli oryndar ielengen.
