قىزىلوردا وبلىسىنىڭ اكىمى نۇرلىبەك نالىبايەۆتىڭ قاتىسۋىمەن جاڭاقورعان اۋدانىندا «رۋحانيات ورتالىعىنىڭ» سالتاناتتى اشىلۋ ءراسىمى ءوتتى، دەپ حابارلايدى Dalanews.kz.

مەرەكەلىك ءىس-شاراعا پارلامەنت سەناتى مەن ءماجىلىسىنىڭ دەپۋتاتتارى ناۋرىزباي بايقاداموۆ، رۋسلان رۇستەموۆ، مۇرات ابەنوۆ، مارحابات جايىمبەتوۆ، مۇرات ەرگەشبايەۆ قاتىستى.

ايماق باسشىسى جۇرتشىلىقتى جاڭا نىساننىڭ اشىلۋىمەن قۇتتىقتاپ، ءوڭىردىڭ مادەنيەت سالاسىندا اتقارىلعان جۇمىستارعا، يگى باستامالارعا توقتالدى.

«پرەزيدەنتىمىز قاسىم-جومارت كەمەل ۇلى «ەلىمىزدىڭ رۋحاني دامۋى ۇلتتىق رۋحقا تىكەلەي بايلانىستى. سول سەبەپتى ازاماتتارىمىزدىڭ رۋحى ءارقاشان بيىك بولۋى ءۇشىن مادەنيەتىمىزگە، رۋحانياتىمىزعا باسا ءمان بەرۋىمىز قاجەت» - دەگەن بولاتىن.

بىلتىر قىزىلوردا وبلىسىندا «رۋحانيات جىلى» جاريالاندى. «اناعا تاعزىم»، «وتباسى ورتالىعى»، 1000 ورىندىق «ونەر» ورتالىعى پايدالانۋعا بەرىلىپ، جاڭادان سيمفونيا وركەسترى، ينكليۋزيۆتى تەاتر، جاستار تەاترى، زاماناۋي بي، حور ۇجىمدارى جاساقتالدى. سىر مادەنيەتىنىڭ نەگىزگى برەندى – جىراۋلىق ءداستۇر وكىلدەرىنىڭ «جىراۋلار ءۇيى» اشىلدى. «سامۇرىق قازىنا تراست» قورىمەن بىرگە "ۇستەل تەننيسى ورتالىعىن"، «قازمۇنايگاز» كومپانياسىنىڭ دەمەۋشىلىگىمەن زاماناۋي ۇلگىدەگى "وقۋشىلار سارايىن" ەل يگىلىگىنە تابىستادىق. بۇگىندە وبلىستىق تاريحي-ولكەتانۋ مۋزەيى، «شىعارماشىلىق اكادەمياسى»، "ورتالىق ستاديون" سالىنۋدا. جاڭا نىساندار بيىل مامىر ايىندا ىسكە قوسىلادى.

"رۋحانيات ورتالىعى – بىرلىكتىڭ ورداسى» رۋحاني قازىنامىزدى تولىقتىراتىن، جۇرتشىلىققا قۋانىش سىيلايتىن ورىنعا اينالسىن. ۇلتتىق قۇندىلىقتارىمىز ۇلىقتالىپ، تاۋەلسىز ەلىمىزدىڭ ابىرويى اسقاق بولعاي! ەل ىرگەسى بەكەم، قۋانىش قۇتتى بولسىن!»،- دەدى ن.نالىبايەۆ.

جيىندا پارلامەنت سەناتىنىڭ دەپۋتاتى ناۋرىزباي بايقاداموۆ، «ايعاق» تەلەراديوكومپانياسىنىڭ باس ديرەكتورى، تۇركىستان وبلىستىق ءماسليحاتىنىڭ دەپۋتاتى، قازاقستاننىڭ قۇرمەتتى ءجۋرناليسى دۋلاتبەك ءابىش جينالعان قاۋىمدى قۇتتىقتادى. قوعام قايراتكەرى، ءناجمادين مۇسابايەۆ اق باتاسىن بەرىپ، اۋداننىڭ وركەندەۋىنە ۇلەس قوسقان ارداگەرلەر مەن مەردىگەر مەكەمە قىزمەتكەرلەرى ماراپاتتالدى.

ايتا كەتەيىك، بيىل - قىزىلوردا تاريحىنداعى ماڭىزدى جىل. وسىدان ءبىر عاسىر بۇرىن مەملەكەت استاناسىن ورىنبوردان اقمەشىتكە كوشىرۋ تۋرالى شەشىم شىعىپ، كەڭەستەردىڭ بۇكىلقازاقستاندىق بەسىنشى سەزىندە «كيرگيز اۆتونوميالى سوسياليستىك كەڭەس رەسپۋبليكاسى» اتاۋى «قازاق اۆتونوميالى سوسياليستىك كەڭەس رەسپۋبليكاسى» دەپ وزگەرتىلگەن. ۇلتىمىزدىڭ تاريحي «قازاق» اتاۋى قايتارىلىپ، رەسپۋبليكا استاناسى اقمەشىت قالاسىن قىزىلوردا دەپ اتاۋ تۋرالى قاۋلى قابىلدانعان. ەلىمىزدىڭ العاشقى ۇكىمەت باسشىلىعى، باسقارۋ ينستيتۋتتارى وسى جەردە قالىپتاسىپ، نىعايدى. العاشقى ونەر، ءبىلىم مەكەمەلەرى اشىلىپ، اسەم عيماراتتار بوي كوتەردى.

بيىل ۇلت تەاترىنىڭ ىرگەتاسى قالانعان قىزىلورداداعى نارتاي بەكەجانوۆ اتىنداعى قازاق اكادەميالىق مۋزىكالىق دراما تەاترىنىڭ قۇرىلعانىنا 70 جىل تولادى. كاسىبي ونەر ۇجىمى وسى جىلدارى

300-دەن استام قويىلىمدى ساحنالاعان. رەسپۋبليكالىق، حالىقارالىق فەستيۆالدەرگە قاتىسىپ، جۇلدەلى ورىندار يەلەنگەن.