Qyzylorda oblysynyń ákimdiginde Qazaqstan halqy Assambleiasynyń 30 jyldyǵy jáne 1 naýryz - Alǵys aitý kúnine arnalǵan merekelik is-shara ótti,- dep habarlaidy Dalanews.kz
Oǵan oblys ákiminiń birinshi orynbasary Daniiar Janalinov, oblystyq Qazaqstan halqy Assambleiasynyń belsendileri, ardagerleri, úkimettik emes uiym jetekshileri, saiasi partiialardyń oblystyq filial tóraǵalary jáne BAQ ókilderi qatysty.
Shara Memlekettik Gimnmen bastalyp, oblys ákiminiń birinshi orynbasary el Prezidentiniń quttyqtaýyn oqydy, barsha qatysýshylarǵa izgi lebizin bildirdi.
"1 naýryz - elimizde tynyshtyq, ózara senim men qurmettiń ornyǵýyna negiz bolǵan Alǵys aitý kúni. Qazaqstan halqy Assambleiasy óziniń 30 jyldyq tarihynda bereke-birligimizdiń uiytqysyna ainalyp, eldegi tatýlyq pen turaqtylyqtyń kepili bolyp keledi. Qyzylorda oblysynda 30-dan astam etnos ókilderi ósip-ónip, Syr óńiriniń damýyna úles qosýda. Qazaqstan halqy Assambleiasy 130-dan astam etnos ókilin biriktirip, jalpyulttyq kelisimniń negizin qalady",- dedi D.Janalinov.
Is-sharada oblystyq Assambleia ardageri Asylbek Jumabaev jáne “Assambleia jastary” uiymynyń belsendi múshesi Bahar Miliiarova sóz sóiledi.
Elimizdegi barlyq etnos ókilderiniń arasynda dostyq pen yntymaqtastyqty nyǵaitý, mádeni almasýdy qoldaý, jastardy ulttyq qundylyqtarǵa baýlý asa mańyzdy. Osy rette Assambleia músheleri óz tájiribelerin bólisip, eldiń birligin saqtap, ony nyǵaitýǵa atsalysýda.
Ataýly kúni birlik pen kelisimdi nyǵaitýǵa úles qosqan azamattarǵa qurmet kórsetildi. QHA belsendileri jáne jumysshy mamandyq ieleri oblys ákiminiń Alǵys hatymen marapattalyp, Qazaqstan halqy Assambleiasynyń 30 jyldyq mereitoiy saltanatty túrde ashyldy.
