قىزىلوردا وبلىسىنىڭ اكىمدىگىندە قازاقستان حالقى اسسامبلەياسىنىڭ 30 جىلدىعى جانە 1 ناۋرىز - العىس ايتۋ كۇنىنە ارنالعان مەرەكەلىك ءىس-شارا ءوتتى،- دەپ حابارلايدى Dalanews.kz
وعان وبلىس اكىمىنىڭ ءبىرىنشى ورىنباسارى دانيار جانالينوۆ، وبلىستىق قازاقستان حالقى اسسامبلەياسىنىڭ بەلسەندىلەرى، ارداگەرلەرى، ۇكىمەتتىك ەمەس ۇيىم جەتەكشىلەرى، ساياسي پارتيالاردىڭ وبلىستىق فيليال ءتوراعالارى جانە ب ا ق وكىلدەرى قاتىستى.
شارا مەملەكەتتىك گيمنمەن باستالىپ، وبلىس اكىمىنىڭ ءبىرىنشى ورىنباسارى ەل پرەزيدەنتىنىڭ قۇتتىقتاۋىن وقىدى، بارشا قاتىسۋشىلارعا ىزگى لەبىزىن ءبىلدىردى.
"1 ناۋرىز - ەلىمىزدە تىنىشتىق، ءوزارا سەنىم مەن قۇرمەتتىڭ ورنىعۋىنا نەگىز بولعان العىس ايتۋ كۇنى. قازاقستان حالقى اسسامبلەياسى ءوزىنىڭ 30 جىلدىق تاريحىندا بەرەكە-بىرلىگىمىزدىڭ ۇيىتقىسىنا اينالىپ، ەلدەگى تاتۋلىق پەن تۇراقتىلىقتىڭ كەپىلى بولىپ كەلەدى. قىزىلوردا وبلىسىندا 30-دان استام ەتنوس وكىلدەرى ءوسىپ-ونىپ، سىر ءوڭىرىنىڭ دامۋىنا ۇلەس قوسۋدا. قازاقستان حالقى اسسامبلەياسى 130-دان استام ەتنوس وكىلىن بىرىكتىرىپ، جالپىۇلتتىق كەلىسىمنىڭ نەگىزىن قالادى"،- دەدى د.جانالينوۆ.
ءىس-شارادا وبلىستىق اسسامبلەيا ارداگەرى اسىلبەك جۇمابايەۆ جانە “اسسامبلەيا جاستارى” ۇيىمىنىڭ بەلسەندى مۇشەسى باحار ميلياروۆا ءسوز سويلەدى.
ەلىمىزدەگى بارلىق ەتنوس وكىلدەرىنىڭ اراسىندا دوستىق پەن ىنتىماقتاستىقتى نىعايتۋ، مادەني الماسۋدى قولداۋ، جاستاردى ۇلتتىق قۇندىلىقتارعا باۋلۋ اسا ماڭىزدى. وسى رەتتە اسسامبلەيا مۇشەلەرى ءوز تاجىريبەلەرىن ءبولىسىپ، ەلدىڭ بىرلىگىن ساقتاپ، ونى نىعايتۋعا اتسالىسۋدا.
اتاۋلى كۇنى بىرلىك پەن كەلىسىمدى نىعايتۋعا ۇلەس قوسقان ازاماتتارعا قۇرمەت كورسەتىلدى. قحا بەلسەندىلەرى جانە جۇمىسشى ماماندىق يەلەرى وبلىس اكىمىنىڭ العىس حاتىمەن ماراپاتتالىپ، قازاقستان حالقى اسسامبلەياسىنىڭ 30 جىلدىق مەرەيتويى سالتاناتتى تۇردە اشىلدى.
