Qyzylorda – Aqtóbe baǵytyndaǵy joldy tórt jolaqqa keńeitý jobasynyń birinshi kezeńi bastaldy, dep habarlaidy Dalanews.kz.
Oblys ákimi Nurlybek Nálibaev, "QazAvtoJol" UK AQ basqarma tóraǵasy Darhan Imanashev, oblystyq máslihat depýtattarynyń qatysýymen Batys Eýropa – Batys Qytai halyqaralyq avtodáliziniń Qyzylorda – Aqtóbe baǵytyn tórt jolaqty etip keńeitý jobasynyń birinshi kezeńiniń bastalý rásimi ótti.
"Úkimettiń erekshe qoldaýymen 2022-2025 jyldary aimaǵymyzdaǵy 1 600 shaqyrym tasjol men kóshelerdi, 30 kópir ótkelin salýǵa, kúrdeli jóndeýden ótkizýge 150 mlrd. teńgege jýyq qarjy bólindi. Nátijesinde jaqsy jaǵdaidaǵy joldardyń úlesi 95 paiyzǵa jetti. Biyl da jol infraqurylymyn damytýǵa baǵyttalǵan 56 jobaǵa biýdjetten 37 mlrd. 845 mln. teńge qaralǵan. Bul qarjyǵa 136 shaqyrym jol men kópir ótkelderi jóndeýden ótedi", - dedi óńir ákimi.
Memleket basshysy 2023 jylǵy 10 qazanda Syr óńirine jumys saparymen kelgende Qyzylorda qalasynan Aqtóbege deiingi tasjoldy tórt jolaqtyǵa aýystyrýdyń jobalaý jumystaryn jedel bastaýdy tapsyrǵan bolatyn. Joba 2 kezeńnen turady:
- Birinshi kezeńi – 26 shaqyrymdyq Qyzylorda qalasynyń ainalma jolyn salý.
- Ekinshi kezeńi – Qyzylorda qalasynan bastap Syrdariia, Jalaǵash, Qarmaqshy aýdandarynyń syrtymen ainalyp ótip, Batys Eýropa – Batys Qytai halyqaralyq kólik dálizine qosylatyn 462 shaqyrym jol salý.
