Jetisý oblysy, Qyzylaǵash aýylynda sý tasqynynan keiin salynǵan úilerge bailanysty daý shyqty. Aýyl turǵyndary burynǵy ákimdi kommýnaldyq baspanany zańsyz iemdendi dep aiyptaýda, dep habarlaidy Dalanews.kz 31-arnanyń Informbiýro baǵdarlamasyna silteme jasap.
Apattan keiin salynǵan 12 úi memlekettik turǵyn úi qoryna alynǵan. Olardyń biri – Smaiylhan Jaisanuly kóshesindegi 6-úi. Turǵyndar bul úide jas mamandar turǵanyn aitady, alaida 2017 jyly baspana iesiz dep tanylyp, keiin sheneýniktiń týysy jekeshelendirip alǵan.
Aýyl turǵyny Sáýle Ámitova sheneýniktiń sotty aldap, úidi óz týysyna aýdaryp alǵanyn málimdedi. Onyń aitýynsha, bul zańsyzdyqqa bailanysty turǵyndar narazylyq bildirip, máseleni kótergen.
“Jalǵan aqparat berip, sotty aldap, basyna aýdaryp alǵan. Sol úshin biz shýlaǵanbyz. Ol qujatty qaitalap jasap, sol úige kirgennen keiin apasynyń atyna aýdaryp alǵan. Sot sheshimi buzylmaǵan. Sot sheshimi buzylmasa, erteń ketedi. Qolhat ýaqyty bitkennen keiin ol úi qaitadan basyna qalady”, – dedi Qyzylaǵash aýylynyń turǵyny Sáýle Ámitova.
Aýyl turǵyndary sheneýniktiń bul úige esh qatysy joq ekenin aitady. Sebebi 2010 jylǵy apatqa deiin ózi de, týystary da Qyzylaǵashta turmaǵan. Bul derekti qazirgi ákim de rastaidy.
“2015-2016 jyldar aralyǵynda sol úi Samihov Aidarǵa memlekettik qyzmetker retinde berildi. Keiin apasy paida boldy. Qandai amalmen ózderiniń jekemenshigine aýdarǵanyn bilmeimin. Biraq sot sheshimi bar. Qazir Samihova sol úidi óziniń jeke menshigine aýdarý týraly sot protsesi júrip jatyr”, – dep málimdedi Qyzylaǵash aýyldyq okrýginiń ákimi Nurlan Dosmaqov.
Qazirgi tańda bul úige qatysty sot protsesteri júrip jatyr. Sonymen qatar aýyldaǵy taǵy 11 úi kommýnaldyq menshikte qalyp, turǵyndar olardy jekeshelendire almai júr. Jergilikti bilik úilerdi aýdandyq turǵyn úi-kommýnaldyq sharýashylyǵynyń balansyna alýdy josparlap otyr, biraq jekeshelendirýdiń talaptary bar.
Turǵyndar úilerdi tegin alǵysy keledi, biraq zań boiynsha tek 1-2 toptaǵy múgedekter men UOS ardagerlerine úiler tegin berilýi múmkin, al qalǵan azamattar úilerdi qaldyq qunymen satyp alýy tiis.
Aýyl turǵyny Aqmaral Qabimoldinova turǵyndardyń úilerdi satyp alýǵa qarajaty jetpeitinin aityp, tegin berýdi talap etti.
Daýǵa ainalǵan úidiń bolashaǵy aldaǵy sot otyrysynda sheshilmek.
