Saryaǵashta áıeliniń burynǵy kúıeýin qyzǵanyshtan óltirmek bolǵan er adamǵa qatysty qylmystyq istiń tergeýi aıaqtaldy, dep habarlaıdy Dalanews.kz.

Túrkistan oblysynyń qylmystyq ister jónindegi mamandandyrylǵan aýdanaralyq soty er adamdy kináli dep tanyp, ony orta qaýipsizdik deńgeıindegi qylmystyq-atqarý júıesi mekemesinde 8 jylǵa bas bostandyǵynan aıyrý jazasyna kesti.

Tergeý materıaldaryna sáıkes, janjal áıeldiń qazirgi jáne burynǵy jubaılarynyń arasynda bolǵan. Qylmysqa qyzǵanysh pen jeke arazdyq sebep bolǵan.

Burynǵy kúıeýi áıeliniń úıine qujattaryn alý úshin kelgen. Bul jaǵdaı áıeldiń qazirgi azamattyq kúıeýiniń ashýyna tıgen. Bir aptadan keıin ol er adamǵa shabýyl jasaýǵa bel býǵan. Aıyptalýshy jábirlenýshige 9 ret pyshaq suqqan. Abyroı bolǵanda, oqıǵa kýágeriniń der kezinde aralasýynyń arqasynda qandy qylmystyń sońy qaıǵyly jaǵdaıǵa ulasqan joq.

Aıta ketsek, áıel jeti jyl buryn burynǵy kúıeýimen ajyrasqan jáne qazirgi azamattyq jubaıymen birge eki qyz tárbıelep otyrǵan.

Sotta aıyptalýshy óz kinásin ishinara moıyndady. Al jábirlenýshi ony keshirgenin jáne renishiniń joq ekenin aıtty. Soǵan qaramastan, sot er adamdy 8 jylǵa bas bostandyǵynan aıyrýǵa úkim shyǵardy.