Qyzai ana meshiti ashyldy
Meshittiń ashylý saltanatyna Almaty jáne Taldyqorǵan qalalarynan ziialy qaýym ókilderi, jergilikti turǵyndar, Qaýymdastyq ókilderi, Shelek okrýginiń ákimdik qyzmetkerleri qatysyp, sóz sóilep, kontserttik baǵdarlama usynyldy.
Meshitti jóndeý jumystaryn «Otandas-El» respýblikalyq qoǵamdyq birlestiginiń músheleri Nurbosyn Ysqaq, Erkintai Maralbaiuly, Raiys Áripjanuly, Juban Oralbai, Muqatai Ábdolla, Janbolat Qurman, Nurturǵan Nurdanbek, Erkin Sársenbai, Turǵanjan Kahap qatarly azamattar qarjylai jáne uiymdastyrý jaǵynan eleýli úles qosqanyn birlestik tóraǵasy Muqan Mamythan myrza arnaiy atap ótti. Meshittiń ashylýyna kelgen jamaǵat ta óz kómekterin atap, aldaǵy ýaqytta rýhaniiat salasynda iske asyrylar kez kelgen sharaǵa belsene aralasýǵa ýáde berdi.
Qyzai ana – isi qazaqqa tanymal analardyń biri. Óziniń sheshendigi men ismerligi, meiirimdiligi men batyrlyǵy arqyly qazaq tarihynda ańyzǵa ainalǵan ananyń urpaqtary millionǵa jýyq. Qazaq handyǵy qurylar tustan ómir súrgen Qyzai ana týraly tarihi dastandar, ańyz-áfsanalar, shejirege arqaý bolǵan san alýan derekter jeterlik.
Buǵan deiin «Qyzai ana» qorynyń uiymdastyrýymen Almaty oblysy Talǵar aýdany Óstemir aýylyndaǵy Qyzai ana kóshesiniń boiynda jyl saiyn dástúrli Naýryz merekesi toilanyp, aýyl turǵyndaryna merekelik kóńil-kúi syilap, oqýshylar arasynda aýdandyq sport jarysy, respýblikalyq jyr músháirasy, oqýshylar men stýdentterge arnaiy stipendiia berilip kelgen edi. Bul shara aldaǵy ýaqytta da óz jalǵasyn tabady.
