Túrkistan oblysynyń ákimi Darhan Satybaldy Energy China International Group Co., LTD. Basqarma tóraǵasynyń orynbasary Siýe Danfenmen kezdesti. Taraptar elde jáne shetelde júzege asyrylatyn jańartylatyn kózderden energiia óndirýge negizdelgen jobalar jáne energiia salasynda atqarylǵan jumystar boiynsha pikir almasty.
«Energy China International Group» kompaniiasy álemdegi jasyl energetika jáne tómen kómirtekti energetika salasynda 20 baǵytta ártaraptandyrylǵan qyzmet kórsetedi jáne Qytaidaǵy jetekshi halyqaralyq kompaniialardyń biri bolyp sanalady. Dúniejúzi boiynsha 6 myńnan astam jobany júzege asyrǵan. Pákistan, Vetnam, Braziliia jáne ózge de memlekettermen jumys júrgizedi.
Túrkistan oblysynda elektroenergetika salasyna, jaryq júielerin modernizatsiialaýǵa, gidro, gaz, elektrostansalar salýǵa nietti.
Túrkistan oblysynyń ákimi Darhan Satybaldy aimaqtaǵy «jasyl energetikany» damytýdaǵy Memleket basshysy Qasym-Jomart Toqaevtyń ustanymy jaily atap ótip, Qazaqstandaǵy jańartylǵan qýat kózin paidalanýdyń mańyzdylyǵyna toqtaldy.
– Túrkistan óńiri Ortalyq Aziiadaǵy biznesti keńeitýdiń jańa kókjiegi bolyp sanalady. Qytai eliniń bai tájiribesi Túrkistan óńiriniń áleýetin kóterýge zor múmkindik beredi. Osyǵan deiin Qytaiǵa jumys saparymen baryp, ózderińizben júzesip edik.
Bizdiń aýdan ákimderi Qytaidaǵy iri óndiris oryndaryn aralap, tájiribe jinaýyn jalǵastyryp jatyr. Osy tájiribelerimizdi paidalana otyryp, oblysymyzda zaýyt-fabrikalar ashýǵa kúsh saldyq.
Ózderińiz usynǵan balamaly energetikany damytý baǵyty – biz úshin óte mańyzdy sala. Biz bul baǵytta Italiianyń «Eni» halyqaralyq energetikalyq kompaniiasymen jumys istep kelemiz. Sizdermen de birlese jumys atqaryp, jańa jobaǵa jan-jaqty qoldaý kórsetýge daiynbyz, – dedi Túrkistan oblysynyń ákimi Darhan Satybaldy.
Oblys ákimi sheteldik investorlardy Túrkistan oblysynyń áleýetimen tanystyryp, birqatar jobalarǵa toqtaldy. Kompaniia basshylyǵy óziniń ozyq tájiribesine súiene otyryp, osy salalardaǵy Túrkistan óńirinde iske asyrylyp jatqan jobalarǵa qatysý nieti týraly málimdedi. Osy oraida jelden jáne kún sáýlesinen jaryq óndirý salasyna 700 mln. AQSh dollary kóleminde investitsiia quiýǵa daiyn.
– Túrkistan oblysynyń bolashaq josparlary bizdi qyzyqtyrady. Bizdiń elde memleket tikelei basqaratyn 90 kompaniia bar. Olardyń ishinde bizdiń kompaniiamyz da bar. Dúniejúzindegi aldyńǵy qatarda turǵan 500 eń iri kompaniianyń ishinde biz 256-shy orynda turmyz. Iaǵni, energetikalyq jańa tehnologiialar boiynsha biz álem boiynsha aldyńǵy qatardamyz. Energetika salasyndaǵy qurylys jumystaryn jasaimyz. Qytaidaǵy elektr qýaty júieleriniń 80%-yn bizdiń kompaniia júzege asyrǵan. Sondyqtan osy saladaǵy tájiribemizdi Túrkistan óńirinde júzege asyrýǵa daiynbyz, – dedi Energy China International Group Co., LTD. Basqarma tóraǵasynyń orynbasary Siýe Danfen.
Taraptar talqylaǵan jańa joba tabiǵatty qorǵaýǵa qosar úlesimen qatar, jańa jumys oryndaryn ashyp, jańa investitsiialyq múmkindikter alyp kelmek.
