Qazaqstan Respýblikasy Energetika ministri Almasadam Sátqaliev bastaǵan delegatsiia Qytai Halyq Respýblikasyna jumys saparymen bardy, dep habarlaidy Dalanews.kz.
Beijińde ministr Memlekettik energetika basqarmasynyń basshysy Van jáne QHR Atom energiiasy agenttigi tóraǵasynyń orynbasary Liýmen kezdesip, atom energetikasy, munai-gaz, elektr energetikasy jáne jańartylatyn energiia kózderi salasyndaǵy yntymaqtastyq máselelerin talqylady. Qytai tarapy Qazaqstanda atom elektr stantsiiasy (AES) qurylysyna qoldaý kórsetýge ázir ekenin atap ótti.
Sapar barysynda Sátqaliev iadrolyq tehnologiialardy jetkizýshiler tizimine engen Qytai Ulttyq iadrolyq korporatsiiasynyń (CNNC) bas direktory Shenmen kelissózder júrgizdi. Taraptar AES qurylysy jobasyn iske asyrýdaǵy seriktestikti talqylap, naqty josparlardy talqylady.
Qazaq delegatsiiasy Qytaidyń atom energetikasyndaǵy ozyq nysandaryn, sonyń ishinde NPR-1000 reaktory ornatylǵan Chjanchjoý atom elektr stantsiiasyn, “Shanghai Electric” óndiristik bazasyn, sondai-aq ýrandy óńdeý jáne baiytý zaýyttaryn aralady.
Ýrandy konversiialaý jáne baiytý zaýytyna barý Memleket basshysy Qasym-Jomart Toqaevtyń eldegi qundy klasterlerdi qurý qajettigi týraly bastamalary aiasynda júzege asty. Bul baǵytta Qazaqstan Respýblikasy Energetika ministrligi keshendi jumystar atqaryp keledi.
Qytai sapary eki el arasyndaǵy energetika salasyndaǵy yntymaqtastyqty tereńdetý jáne Qazaqstannyń energetikalyq áleýetin damytý jolyndaǵy mańyzdy qadam boldy.
Aita keteiik, 2 qyrkúiekte Qasym-Jomart Toqaev Qazaqstanda atom elektr stantsiiasyn salý boiynsha referendým ótkizý týraly Jarlyqqa qol qoidy.
Referendým boiynsha daýys berý 6 qazanda ótti. Bul rette AES salýdy daýys bergenderdiń 71,12 paiyzy qoldady. Referendýmǵa daýys berý tizimine 12,3 millionǵa jýyq qazaqstandyq engizilgen.
Buǵan deiin Toqaev sheteldik investorlar keńesiniń 36-shy plenarlyq otyrysynda Qazaqstan AES qurylysy úshin halyqaralyq konsortsiým qurý máselesin pysyqtap jatqanyn málimdegen edi.
“Bizdiń elimiz iadrolyq otyn tsikli aiaqtalǵan derlik álemdegi eń iri ýran óndirýshi sanalady. Ózderińiz de biletindei, jaqynda ótken jalpyulttyq referendýmda Qazaqstanda alǵashqy atom elektr stantsiiasynyń qurylysy maquldandy. Bul bizdiń energetikalyq qaýipsizdigimizge uzaq merzimdi investitsiia sanalady. Qazirgi ýaqytta biz osy joba úshin halyqaralyq konsortsiým qurý máselesin pysyqtap jatyrmyz”, — dedi Qasym-Jomart Toqaev.
Qazaqstan yqtimal tehnologiia jetkizýshisi retinde tórt kompaniiany qarastyryp jatyr. Olar, reseilik "Rosatom", Qytaidyń CNNC, Koreianyń KHNP jáne Frantsiianyń EDF kompaniialary.
Eske salaiyq, Reseidiń Syrtqy ister ministri Lavrov ta Qazaqstanda birinshi atom elektr stantsiiasyn salý jónindegi halyqaralyq konsortsiýmǵa qatysýǵa daiyn ekenin málimdegen edi.
"Resei kómektesýmen ǵana shektelmei, AES qurylysyna qatysty usynystaryn da daiyndap qoidy. Biz Qazaqstanda ótken referendýmdy muqiiat baqylap, prezident Toqaevtyń atom energetikasyn damytý josparlaryna qoldaý kórsettik. "Rosatom" osy máselede qazaqstandyq dostarymyzben birlesip jumys isteýge tolyq daiyn. Sondai-aq basqa memleketterdiń tiisti agenttikterimen jáne qurylymdarymen yntymaqtasýǵa ashyqpyz", – dedi Lavrov.
