Túrkimenstannyń shyǵysyndaǵy Lebap aımaǵynda 40 jastan asqan er sheneýnikterge aq shashpen júrýdi mindettegen. Bul týraly Azattyqtyń Túrkimen qyzmeti habarlady. Osylaısha memlekettik qyzmetkerler samaıyna aq túsken el prezıdenti Gýrbangýly Berdimuhamedov sıaqty aq shashpen júrýi tıis.

Azattyqtyń Túrkimen qyzmetiniń habarlaýynsha, 1 aqpannan bastap sheneýnikter, muǵalimder men dárigerlerge shash boıýǵa tyıym salynǵan. Shashyna aq túspegender shashtaryn aqqa ıa surǵa boıaýy tıis.

Azattyqtyń Túrkimen qyzmetiniń dereginshe, eger prezıdent Berdimuhamedov aımaqqa kele qalǵan jaǵdaıda shashyna aq túsken sheneýnikter ǵana kezdesýge kirgiziledi.

2019 jyly qańtarda Túrkimenstannyń memlekettik mekemelerine, mektep, aýrýhanalarǵa Berdimuhamedovtiń jańa portretterin satyp alý mindettelgen. Jańa portretterde prezıdenttiń shashyna aq túskeni baıqalady. Buǵan deıingi portretterde onyń shashy qara bolǵan edi.