Qyrǵyzstan parlamenti ózin-ózi taratý týraly sheshim qabyldady, dep habarlaidy Dalanews.kz qyrǵyzstandyq BAQ-qa siltep.
25 qyrkúiekte ótken otyrysta depýtattar parlamenttiń ózin-ózi taratý bastamasyn qoldap, daýys berdi. Qatysqan 89 depýtattyń 84-i qoldap, eshkim qarsy bolmaǵan.
Depýtat Ýlan Primov baiandama jasaǵan. Onyń aitýynsha, sheshim eki sailaý naýqanynyń qatar ótýimen bailanysty. Elde parlament sailaýy 2026 jylǵy qarashaǵa, al prezidenttik sailaý 2027 jylǵy qańtarǵa belgilengen.
Al zańǵa sáikes parlament ózin-ózi taratý týraly sheshim qabyldaǵannan keiin prezident bes kún ishinde depýtattardyń kezekten tys sailaýyn taǵaiyndaýǵa tiis. Aldyn ala boljam boiynsha sailaý 2025 jylǵy 30 qarashada ótedi.
Bul Qyrǵyzstan parlamentiniń alǵash ret merziminen buryn jumysyn toqtatýy emes. 1994 jyly Joǵarǵy keńestiń alǵashqy quramy ózin-ózi taratqan. 2007 jyly da parlament taratyldy, al 2010 jylǵy sáýir revoliýtsiiasy memleket basshysyn da, depýtattardy da ornynan ketirdi. 2020 jyly ótken parlament sailaýynyń nátijeleri de joiylǵan edi.
