Qazaqstan kókpar federatsiiasynyń ókili Sáken Seiithan Túrkistanda ótip jatqan kókpardan álem chempionatyna Qyrǵyzstan quramasynyń nelikten qatyspaǵanyn túsindirdi, dep habarlaidy Dalanews.kz.
Onyń aitýynsha, sporttyq jarystardyń erejesine sáikes, qatysýshy komandalar týraly resmi aqparat mandattyq komissiia jumysy tolyq aiaqtalǵannan keiin ǵana jariialanady. Osyǵan bailanysty federatsiia tarapynan aldyn ala málimet berilmegen.
“Mandat komissiiasy jumysynyń qorytyndysyna sáikes, qatysýshy komandalar týraly aqparat federatsiianyń resmi áleýmettik paraqshasyna jariialandy”, - dedi ol.
Sondai-aq ol Qyrǵyzstan tarapynyń ýájine de túsinikteme berdi.
“2025 jyly mamyr aiynda Respýblikalyq federatsiia quramy tolyqtai ózgerdi. 2025 jyl - kókpardyń ishki máselelerine saraptaý men saralaý jumystarynyń júrýine bailanysty halyqaralyq jarystar ótpedi.
2026 jyldyń qańtar aiynyń sońynda Ulttyq jáne at sporty ortalyǵynyń Álem Chempionatyn ótkizý týraly usynysyn qabyl alyp, jarysty ótkizý týraly sheshim qabyldandy. Halyqaralyq Kókpar qaýymdastyǵyna múshe bolyp tabylatyn barlyq elderge bir ýaqytta shaqyrý joldandy. Shaqyrýdy qabyl alǵan elder Álem Chempionatyna qatysýǵa keldi”, - dep tolyqtyrdy ol.
Federatsiia ókili Qyrǵyzstan quramasynyń qatyspaýy chempionat deńgeiine áser etpeitinin de atap ótti.
“Sebebi qatysýshy komandalardyń deńgeii ósip keledi”, - dep túiindedi Seiithan.
Aita keteiik, 17 naýryz kúni Túrkistanda jańadan salynǵan atshabarda kókpardan álem chempionaty jalaýyn kóterdi. Dúbirli dodaǵa álemniń 9 elinen komandalar qatysyp jatyr. Atap aitqanda, Aýǵanstan, Qytai, Majarstan, Mońǵoliia, Resei Federatsiiasy, Tájikstan, Ózbekstan, Túrkiia jáne Qazaqstan quramalary júlde jolynda baq synaidy.
Eske salaiyq, buǵan deiin sport jýrnalisi Aqyrys Seiitqazy Kókpar federatsiiasynyń aqparattyq jumysyn synǵa alǵan edi. Onyń aitýynsha, Túrkistanda ótetin álem chempionatyna Qyrǵyzstan quramasynyń qatyspaityny týraly federatsiia resmi túrde aldyn ala habarlamaǵan. Jýrnalist naqty aqparat alý úshin federatsiia ókilderine júgingenimen, tolyqqandy jaýap ala almaǵanyn jetkizdi. Sondai-aq ol chempionattyń uiymdastyrylýy men BAQ-pen bailanys deńgeiine qatysty syn aitty.
