Qazir eks-prezident Nursultan Nazarbaevqa arnalǵan eskertkish "Rýh Ordo" mádeni ortalyǵynda joq, videolar men fotolarǵa qaraǵanda ony bir jyl buryn alyp tastaǵan siiaqty dep sait dálel retinde birneshe video men sýretti kórsetedi.
"Nursultan Nazarbaev eskertkishi Ystyqkóldegi "Rýh Ordodan" alynyp tastaldy. Eskertkish kólge jaqyn – aryqtardyń oń jaǵynda ornalasqan bolatyn. Ol 2005 jyly Nazarbaev 65 jyl tolýyna orai turǵyzylǵan. "Rýh-Ordonyń" jańa sýretterinde eskertkish kórinbeidi. Eskertkishti bir jyldan astam ýaqyt buryn alyp tastaǵan siiaqty, sebebi ol jaqta byltyr demalǵandardyń videosynda eskertkish joq" dep jazdy sait beisenbi kúni.
Qyrǵyzstan prezident ákimshiligi aqparatqa túsinikteme bermegen. Osy aptada Ortalyq Aziia elderi basshylarynyń konsýltativtik kezdesýi osy Ystyqkól jaǵalaýyndaǵy Sholpan-Ata qalasynda ótken. Bir kún buryn osy qalada qazaq jazýshysy Muhtar Áýezovtiń úi-murajaiy aldynda onyń biýsti ashyldy.
Ystyqkólge Nazarbaev eskertkishi 2005 jyly ornatylǵan. Sol ýaqytta Qyrǵyzstan biligi Nazarbaevqa ornatylǵan eskertkishtiń, qyrǵyzdardyń qazaqtarǵa degen mahabbatynyń kórinisi bolyp tabylatyndyǵyn málimdegen.
Belsendiler men sarapshylar Nazarbaev tusynda Qazaqstanda jeke basqa tabyný beleń aldy dep sanaidy. Ol prezident bolyp turǵan tusta elde oǵan eskertkishter ornatylyp, áýejai, iri qalalardyń ortalyq kósheleri, ýniversitet pen mektepter jelisi Nazarbaevtyń atymen ataldy. Buǵan qosa, Qazaqstannyń birneshe qalasynda eks-prezident atyndaǵy saiabaq, sport kesheni jáne mýzeiler bar.
Qańtar oqiǵasynan soń Nazarbaevtyń bilikke yqpaly álsiregen. Qańtar qyrǵyny kezinde Taldyqorǵanda onyń eskertkishi qulatyldy. Nur-Sultan qalasyn Astana dep qaita ataý týraly petitsiia jazyldy. Nazarbaev pen onyń otbasy burynǵy qudyretinen birtindep aiyryla bastady, týǵan-týysy laýazymdy qyzmetterinen tústi, keibiri tutqyndaldy.
Nazarbaev bilik qurǵan 29 jylda onyń qyzdary men ainalasyndaǵy jaqyndary eldegi eń bai adamǵa ainaldy. Onyń qyzdary men kúieýbalalary, jaqyndarynyń sheteldegi úileri men ofshordaǵy esepshottary bary anyqtalǵan.
